«Ոչ»-ը դա «չէ»-ն է, իսկ «չէ»` նշանակում է ոչ էական. Գալուստ Սահակյանի գոհարներից

Այսօր ԱԺ նախագահ Գալուստ Սահակյանը, պատասխանելով Սահմանադրական փոփոխությունների ու դրա դեմ ստեղծված «Ոչ» շարժման մասին հարցին, որին միացել է նաև «Ժառանգություն» կուսակցությունը, լրագրողներին ասաց. «Մենք որևէ մեկին չենք համոզում: «Ոչ» արտահայտություն չկա, դա «չէ»-ն է, իսկ «չէ»` նշանակում է ոչ էական»:

Ըստ ԱԺ նախագահի` սահմանադրական փոփոխությունների դեմ ստեղծվող շարժումը ընդամենը կուսակցական իմիջի բարձրացման նպատակ է հետապնդում:

Հարցին` տեղյա՞կ է, արդյոք, որ Ռոբերտ Քոչարյանը ևս հնարավոր է միանա «Ոչ» շարժմանը, ասաց, որ Քոչարյանը դեռևս հրապարակային հայտարարություն չի արել դրա վերաբերյալ: «Ժողովուրդը «Դեմ»-ին սովորել էր, բայց «Ոչ»-ը դեռևս ես էլ չեմ հասկանում»,- ասաց ԱԺ նախագահը:

Լրագրողների ճշտող հարցին` հնարավո՞ր է, որ Ռոբերտ Քոչարյանը գլխավորի սահմանադրական փոփոխությունների դեմ իրականացվող շարժումը, պատասխանեց. «Հայաստանի երկրորդ նախագահը, որպես պատմական դեմք, բավական ուժեղ դեմք է, բայց քաղաքացիական հասարակության ու քաղաքական դաշտում ուժեղներն ունենում են ուժեղ թիմ: Չեմ կարծում, որ ուժեղ թիմ ունի»:

Իսկ ի՞նչ պաշտոնում է իրեն տեսնում սահմանադրական փոփոխություններից հետո, ԱԺ նախագահը պատասխանեց. «Գալուստ Սահակյան պաշտոնում»: