Մահացել է Ցեղասպանությունից փրկված 101-ամյա Եվգինե Սալիբյանը

ԱՄՆ-ում 101 տարեկան հասակում մահացել է Հայոց ցեղասպանությունից փրկված Եվգինե Ափոշյան-Սալիբյանը. տեղեկացնում է Asbarez-ը:

Նա բնակվում էր Կալիֆոռնիայի Միշն-Հիլսում` «Արարատ» տանը և, որպես Հայոց ցեղասպանության վերջին ականատեսներից մեկը, համայնքային միջոցառումներին մշտապես պատմում էր իր ընտանիքի պատմությունը:

Սալիբյանը ծնվել է 1914 թվականի հունվարի 14-ին Արևմտյան Հայաստանի Այնթապ քաղաքում, 5 զավակներ ունեցող ընտանիքում: Ցեղասպանությունից փրկվելու նրա պատմությունը գրավել է շատերի, ինչպե նաև հայտնի լրագրող Ռոբերտ Ֆիսկի ուշադրությունը: Ֆիսկը 2014 թվականին Սալիբյանի մասին գրել է  The Independent թերթում: 

Այս տարի Հայոց ցեղասպանության 100-ամյա տարելիցի շրջանակներում Սալիբյանը Հոլոքոստը վերապրած Մալա Լանգհոլցի հետ համահեղինակել է մի հոդված, որն ապրիլ ամսին հրապարակվել է Asbarez-ում և Հրեական հանդեսում։