Արևային այրվածքներից խուսափելու միջոցները

Հանգստի մեկնելուց առաջ խիստ կարևոր է իմանալ արևային այրվածքներից արդյունավետ պաշտպանվելու և այրվածքների դեպքում առաջին բուժօգնության կանոնները:

Արևային այրվածքը մաշկի վնասումն է՝ պայմանավորված ուլտրամանուշակագույն ճառագայթների գերդոզավորմամբ: Արևային այրվածքի նշաններն են` մաշկի կարմրությունը և բշտերը:

Ինչպե՞ս զերծ մնալ արևային այրվածքներից

1. Խուսափել արևի ուղիղ ճառագայթներից ժամը 10-16-ն ընկած ժամանակահատվածում: Այս շրջանում արևի ճառագայթները հատկապես վտանգավոր են:

2. Շոգին կրել լայնեզր գլխարկ և չմոռանալ արևապաշտպան ակնոցների մասին:

3. Հետազոտությունները պարզել են, որ շոգ օրերին նախապատվությունը պետք է տալ մուգ կապույտ հագուստին, քանզի հենց այս գույնն է առավելագույնը պաշտպանում մաշկը արևի ճառագայթների վնասակար ազդեցությունից:

4. Այրվածքների և մաշկի քաղցկեղի կանխարգելմանը նպաստում են SPF և PPD նշումներով արևապաշտպան քսուքները` պաշտպանության գործոնի 30 կամ 50 միավորով:

Ի՞նչ անել արևային այրվածքների դեպքում

Խուսափե՛ք այրվածքի մակերեսին սառույցի անմիջական կիրառումից:

Այրվածքին բուսայուղ և թթվասեր մի՛ քսեք:

Այրվածքի մակերեսին խոնավ գործվածք դրեք:

Օգտագործեք ոչ ստերոիդային հակաբորբոքային միջոց, այն կթեթևացնի ցավը և կնվազեցնի կարմրության աստիճանը: