7 անգամ դատապարտված «Պեսոկը» տաքսու վարորդից հափշտակել է ոսկի մատանին

Հունիսի 1-ին մայրաքաղաքի Քանաքեռ -Զեյթուն թաղամասի Սարկավագի փողոցի շենքերից մեկի վերալակում  տաքսու ուղևորը` «Պեսոկ» մականունով նախկինում 7 անգամ դատապարտված Հայկ Գալստյանը, խաբեությամբ տաքսու վարորդից վերցրել էր վերջինիս մատանին, իսկ հետո սպառնացել դանակով` «փախի ստուց»:

 Այս մասին հաղորդում է ՀՀ ոստիկանությունը: Տուժող վարորդը ոստիկանությանը հայտնել էր, որ մեքենան կայանած է եղել «Շրջանայինի» մոտ, երբ «Պեսոկը» մոտեցել է, հայտնել, որ գնում են Այնթափ գյուղ, իջել է, 20 րոպե անց վերադարձել, կարգադրել տաքսին քշել Քանաքեռ-Զեյթունի ուղղությամբ,  ճանապարհին նորից մեքենան կանգնեցրել «Սաս» սուպերմարկետի մոտ, վարորդից 8000 դրամ ուզել` պատճառաբանելով, որ իր մոտ դոլար է, այս գումարով առևտուր արել, նրան հյութ ու լահմաջո հյուրասիրել, ապա վերջնականգառում առաջարկել իր հետ տուն բարձրանալ, որպեսզի և′ գումարը կվերադարձնի, և′ վարորդի ձեռքի մատանին ցույց տա տանեցիներին:

«Վերալակի մեջ տվեցի, դուրս գալիս դրեց  ափի մեջ, մի տեսակ եղավ… , այստեղ կասկածեցի, ասացի` տուր մատանին,  ասաց` ի՞նչ մատանի, փախի ստեղից,  պնդեցի, ձեռքը տարավ դանակին՝ սև պատյանով, վախեցա ու փախա»,-պատմում է տուժողը:

«Պեսոկ» մականունով Հայկ Գալստյանը իր անունը վաստակել է, երբ տարիներ առաջ շաքարավազի մի գործարքի ժամանակ կարողացել է խաբել մի հայտնի գործարարի:

«7 անգամ դատապարտվել եմ,  բոլորն էլ միամտության համար»,-ոստիկանությանն ասել է խարդախը: