Բիբինը գոնե սպառողներին հարգեր. Արմեն Ռուստամյան

Արդեն տեղեկացրել ենք, որ Հանրային ծառայությունները կարգավորող հանձնաժողովի շենքի առջեւ շարունակվում է բողոքի ակցիան էլեկտրաէներգիայի թանկացման դեմ:

Ցուցարարների հետ է նաև ՀՅԴ Բյուրոյի քաղաքական ներկայացուցիչ, ԱԺ ՀՅԴ խմբակցության ղեկավար Արմեն Ռուստամյանը: Նա լրագրողների հետ զրույցում նշեց, որ իր համար պարզապես անընդունելի է Բիբինի նման մոտեցումը: Հիշեցնենք, որ ՀԷՑ-ի տնօրեն Եվգենի Բիբինը այսօր ներկա չէր ՀԾԿՀ-ի նիստին:

Ռուստամյանը նշեց, որ հանձնաժողովը բացահայտել է այնպիսի բաներ, որոնք ապացուցում են, որ անարդյունավետ կառավարում է տեղի ունեցել: 

Բացի այդ` նա կարծիք հայտնեց, որ անհրաժեշտություն է, որ ՀԾԿՀ-ի կազմում ընդգրկված լինեն ընդդիմադիրներ:

Ըստ Արմեն Ռուստամյանի` Բիբինը, որպես մենաշնորհ ընկերության ներկայացուցիչ, կարող էր չգալ հանձնաժողովի նիստին, սակայն, նկատի ունենալով սպառողների նկատմամբ հարգանքը, պետք է գար: «Մեծ հաշվով նա մոնոպոլ ընկերության ղեկավար է, ներկայացրել է հայտ, իսկ մնացածն արդեն մեր գործն է: Բայց Բիբինը պարտավոր էր հարգել առնվազն իր սպառողներին. մամուլով են իրար հետ խոսում, ճիշտ չէ: Ինքն էլ գիտի, որ համապատասխան փաստարկներ չկան»,- ասաց Ռուստամյանը:

Նա հավելեց, որ իշխանությունները չունեն իրավական լծակներ` Բիբինին ստիպողաբար նիստին բերելու: