Որ Ռուսաստանը մեր մասին չմտածեր, Պուտինը կգա՞ր Հայաստան. 53 տարվա կոմունիստ

Այսօր` մայիսի 1-ին, Աշխատավորների օրը,  Կոմունիստական կուսակցության շքերթին մասնակցում էր նաև 53 տարվա կոմունիստ, Երևանի ագրարային համալսարանի դասախոս Սայաթ Համբարձումյանը: 10 տարի աշխատել է որպես Նոյեմբերյանի շրջանի ռայկոմի քարտուղար:

«Իմ աշխատած տարիներին Նոյեմբերյանը տալիս էր Հայաստանի պտղի 30 տոկոսը: Մենք փոքր ժողովուրդ ենք, իսկ էս աշխարհում ով ում հասնում` ջարդում է: Եթե Ռուսաստանի  102-րդ ռազմաբազան չլինի Լենինականում, թուրքերը 3 օրում մեզ կուտեն»,- ասում է Սայաթ Համբարձումյանը:

Մեր այն դիտարկմանը, որ հենց նույն 102-րդ ռազմաբազայի ռուս զինվորը բնաջնջեց հայկական մի ամբողջ ընտանիք, պատասխանեց, որ «խելառ մարդիկ ամեն տեղ էլ լինում են, դա չի կարող արտահայտել ռուսների միտքը»: Կոմունիստը կարծում է, որ դա կա'մ կազմակերպած էր, կա'մ գժված մարդու գործ է: Նրա խոսքով` 3 միլիոն հայ ապրում Ռուսաստանում, նրանք Հայաստան են ուղարկում տարեկան 2 միլիարդ գումար:

Համբարձումյանը շեշտեց, որ Ռուսաստանը որոշել է Հայաստան ներմուծվող գազի գինն իջեցնել:

«Բա ո՞ւմ գնանք` թիկունք բռնենք: 3 գլուխ ժողովուրդ ենք ստեղ, ո՞վ ա մեր տերը: Միշտ էլ էդպես է եղել` մեկը պետք է հովանավոր մեզ կանգնի»,- ասաց նա:

Մեր հարցին, թե ինչպե՞ս է, որ դաշնակից Ռուսաստանը զենք է վաճառում Ադրբեջանին, որով սպանվում են մեր զինվորները, կոմունիստ դասախոսը պատասխանեց, որ բիզնես շահեր են, մնացած բոլոր դեպքերում Ռուսաստանը և նրա նախագահ Պուտինը Հայաստանին լավ են վերաբերվում, դրա վկայությունն է նաև այն, որ ապրիլի 24-ին Պուտինը եկավ Հայաստան ու հնչեցրեց իր խոսքը:

Հարցին, թե ի՞նչ կարծիք ունի Պուտինի մասին, պատասխանեց. «Նրա մոտ ես տեսնում եմ դեպի սոցիալիզմի գաղափարները տանող բաներ: Նա ԿԳԲ-ի աշխատող էր, և էն, որ ինքը ուզում է հզորացնել, երկրները միավորել, դա էդտեղից է գալիս»: