Մշակույթի նախարարությունում Ժիրայր Դադասյանից են հարցնում.«Թատրոնի շենքից ի՞նչ կա»

Ոչ մի բացատրություն չկա, թե ինչու չի լուծվում Մնջախաղի թատրոնի շենքի հարցը: Այս մասին լրագրողների հետ հանդիպման ժամանակ նշեց թատրոնի գեղարվեստական ղեկավար Ժիրայր Դադասյանը:

Ըստ նրա` կենտրոն համայնքում 3-4 սենյականոց մեկ բնակարան գնելուն համարժեք գումար է պետք շենքի կառուցման համար: «Մեզ մեծ տարածք պետք չէ, քանի որ մնջախաղը կամերային ժանրի է` 100 տեղանոց դահլիճ է պետք: Թատրոնի շենքի կառուցման հարցում շահագրգիռ է նաև ներկայիս քաղաքաշինության նախարարը, իսկ ես էլ ատյան չի մնացել, որ չդիմեմ այդ հարցով, բայց, միևնույն է, ոչ մի տեղաշարժ»,- ասում է Դադասյանը:

Ըստ նրա` մշակույթի նախարարությունում դեռ մի բան էլ իրեն են հարցնում` շենքից ի՞նչ կա: Դադասյանը, սակայն, նշում է նաև, որ թատրոնը շենքը չէ, և իրենք ակտիվորեն աշխատում են` չնայած ոչ թատերական պայմաններին:

«Մեր թատրոնը, կարող եմ ասել, ամենաշատը հյուրախաղերի գնացող և դրսում հայկական թատերարվեստը ներկայացնող թատրոնն է: Հիմա էլ պատրաստվում ենք Թբիլիսի գնալ, իսկ աշնանը` Մեքսիկա»,- ասաց Դադասյանը: