Քաղաքականությունը խանգարում է ճշմարտության մասին բարձրաձայնելուն. Արթուր Աբրահամ

Այսօր Ծիծեռնակաբերդի հուշահամալիրում էր անվանի բռնցքամարտիկ Արթուր Աբրահամը:

Yerkir.am-ի հարցին, թե ինչպե՞ս է վերաբերվում հուշահամալիրում չորս երկրների նախագահների ներկայությանը, պատասխանեց. «Տխուր է առիթը: Ինչևէ, հպարտ ենք, որ այդ նախագահները ժամանել են Հայաստան ու կիսում են հայերի վիշտը»:

Արթուր Աբրահամը նշեց, որ ինքը երեկ մասնակցել է Էջմիածնում սրբադասման արարողությանը:

Ինչ վերաբերում է Օբամայի դիրքորոշմանը, որ նա այս տարի էլ խուսափեց 1915թ. դեպքերը անվանել ցեղասպանություն, Արթուր Աբրահամը կարծիք հայտնեց, որ դա քաղաքական դիրքորոշում է, բայց կգա ժամանակը, որ ստիպված կլինեն Ցեղասպանությունը ճանաչել:

«Իհարկե, ոնց ցույց է տալիս կյանքը,  քաղաքականությունը խանգարում է ճշմարտության մասին բարձրաձայնելուն, ճշմարտությունն այն է, որ ցեղասպանություն եղել է, իսկ քաղաքականությունն այն է, որ նրանք չեն ճանաչում դա: Բայց կգա ժամանակը, և կճանաչեն: Օբաման չասի, Օբամայի հաջորդները կասեն»,- համոզված է բռնցքամարտիկը:

Դիտարկմանը, որ աշխարհահռչակ հայերն իրենց գործով բարձրաձայնում են Հայոց ցեղասպանության մասին կամ ստիպում խոսել դրա մասին, այնպես, ինչպես Քիմ Քարդաշյանը, SOAD ռոք խումբը, Արթուր Աբրահամը պատասխանեց. «Ես էլ` իմ բոքսով: Ամեն մի հաղթանակ նվիրում եմ Զեղասպանության զոհերի հիշատակին և պահանջում եմ աշխարհից` ճանաչել Հայոց ցեղասպանությունը»: