Մեր պատմության ոչ մի պահի համար չենք ամաչում. թուրքերը չեն հանգստանում

Թուրքիայի եվրոպական հարցերի նախարար Վոլքան Բոզքըրն իր վրդովմունքն է հայտնել Հռոմի Ֆրանցիսկոս պապի՝ 1915 թվականի զանգվածային սպանությունները ցեղասպանություն որակելու կապակցությամբ. տեղեկացնում է Milliyet-ը:

Մամուլի ասուլիսի ընթացքում Բոզքըրը պատասխանել է Հռոմի պապի հայտարարությունների վերաբերյալ` լրագրողների հարցերին:

Նշելով, որ Պապի պարտականությունները մարդկանց կրոնական հավատն ուժեղացնելն ու աշխարհն ավելի գեղեցկացնելու ուղղությամբ աշխատանքներ տանելն է, Բոզքըրն ասել է. «Սակայն Ֆրանցիսկոս պապի հայտարարությունը անցնելու է համաշխարհային պատմության էջեր՝ որպես պատմական թշնամանք:  Ճշմարտությանը հակասող, պատմական ոչ մի փաստի վրա չհիմնված, անընդունելի այս հայտարարությունը Թուրքիան անտեսելու է»: Ապա հավելել է. «Որպես թուրք ազգ՝ մեր պատմության ոչ մի հատվածի, ոչ մի պահի համար չենք ամաչում: Մեր բոլոր արխիվները բաց են: Աշխարհի ակադեմիկոսներն ունեն օսմանյան արխիվներն ուսումնասիրելու հնարավորություն: Մեր ուսումնասիրություններում չենք հանդիպել 1915 թվականի վերաբերյալ որևէ ապացույցի, ինչի մասին պնդում են: Այս իսկ պատճառով Պապի հայտարարությունները չարաբաստիկ եմ համարում»:

Հիշեցնելով, որ Հռոմի պապը Արգենտինայի քաղաքացի է, Բոզքըրն ասել է. «Ուզում եմ հիշեցնել, որ Արգենտինան այն երկիրն է, որ ընդունել է հրեաների ցեղասպանությունն իրագործողներին: Արգենտինայում, դժբախտաբար, Հայկական սփյուռքը կառավարում է մամուլն ու բիզնեսը: Կարծում եմ՝ Պապն իր խոսքերն ուղղելու կարիք կունենա: Ամեն դեպքում՝ բացարձակապես անընդունելի և անհիմն են: Ես կտրականապես դատապարտում եմ այն»:

Հարցին, թե քաղաքական ինչ-որ ազդեցություն կունենա՞ն Պապի հայտարարությունները, Բոզքըրը պատասխանել է. «Ո’չ»: