Հայոց ցեղասպանության թեմայով գրքի շնորհանդես` Վաշինգտոնում

Ապրիլի 10-ին ԱՄՆ-ում ՀՀ դեսպան Տիգրան Սարգսյանի հովանու ներքո դեսպանությունում տեղի ունեցավ Մեթյու Կարանյանի «Պատմական Հայաստանը 100 տարի անց» անգլերեն գրքի շնորհանդեսը: Գրքում ամբողջացված են վերջին գրեթե քսան տարվա ընթացքում Մեթյու Կարանյանի կողմից Վանում, Անիում, Կարսում և պատմական Արևմտյան Հայաստանի այլ շրջաններում կատարված հայկական հուշարձանների 125 լուսանկարներն ու դրանց պատմությունը, տեղեկացնում է ՀՀ ԱԳՆ լրատվական ծառայությունը:

Մեթյու Կարանյանը միջոցառման մասնակիցներին ներկայացրեց մի շարք մանրամասներ իր հետազոտությունների, 1915թ. Ցեղասպանությունից առաջ և հետո տարբեր հայկական հուշարձանների պատմության, ինչպես նաև տեղի բնակիչների հետ իր ունեցած շփումների մասին:

Գրքում հեղինակն առանձնահատուկ անդրադառնում է իր հանդիպած հայերի կամ հայկական արմատներ ունեցող մարդկանց պատմությանը: Մեթյու Կարանյանն իր գիրքը նվիրել է իր երկու տատերին և բոլոր հայ կանանց, ովքեր վերապրել են Ցեղասպանության անմարդկային զրկանքները և այնուհետև իրենց մեջ ուժ գտել` վերստեղծելու հայկական համայնքները Հայաստանից դուրս և ապահովելու հաջորդ սերունդների հայկական ինքնության պահպանումը: