Ստեփանակերտում կայացել է հետերկրաշարժյան 30 տարիների մասին պատմող գրքի շնորհանդես

«Արցախպրես»-ի  թղթակցի     հետ  զրույցում   Լ.  Մկրտչյանը,  խոսելով   գրքի   լույսընծայման  մտահղացման   մասին,   ասել  է, որ     մեկ  տարի  առաջ   նա  գրել  է  «Ժաժքի  տակ  մնացած  լայքեր»  վերնագրով  մի   պատմվածք, որը, երբ   տեղադրել է համացանցում,    մեծ   արձագանքներ   է ունեցել:  Պատմվածքը   տպագրվել  է նաև  Գյումրիի  և  Արցախի  պաշտոնական թերթերում: Հեղինակը  շարունակել է գրել  նոր  պատմվածքներ, որոնք  հետագայում   վեր է ածվել «10 950 օր ժաժք» ժողովածուի:

Խոսելով  գրքի «10 950 օր ժաժք» վերնագրից՝  Լ.  Մկրտչյանն  ասել է, որ   (ժաժքը՝  գյումրվա  բարբառով  նշանակում  է  երկրաշարժ) եթե  10  հազար   950  օրը  տարիների   վերածվի,   ստացվում  է  30  տարի:     

Գրքի  հերոսները  նորանկախ   ժամանակների    ոգեկիրներն   են՝  իրենց   ճակատագրի  բեկբեկումներով:    

«Ես արհավիրքի  ժամանակ  հինգ  տարեկան   երեխա  էի: Մորս  հանձնարարությամբ  միացրի  հարթուկը: Միացնելու  պահին   ցնցում զգացի: Ինձ   թվաց՝   ճիշտ   չեմ  միացրել: Հետո  ամեն  ինչ  փուլ եկավ: Սա  էր   իմ  առաջին  տպավորությունը երկրաշարժից: Հիշում  եմ   նաև  գյումրեցիների տնակներում ապրելու   ծանր  ու  դժվարին  տարիները: Ես  ևս  ապրել  եմ  տնակում  և դպրոց եմ հաճախել այնտեղից»,-պատմել  է  Լ.  Մկրտչյանը՝  նշելով, որ  իր   այս  գրքում   ներկայացնում  է երկրաշարժի աղետալի օրերի   իրական   պատմությունները  որոնք  կատարվել  են  իր  շրջապատում:  Այսօր  էլ  յուրաքանչյուր գյումրեցու՝   աղետից  ստացված  վերքերը  չեն  ամոքվել: