Երեք գրքի շնորհանդես՝ Թեհրանի Հայ Դատի հանձնախմբի նախաձեռնությամբ

Մարտի 4-ին Թեհրանի Հայ Դատի հանձնախմբի (ՀՈՒՍԿ) գրասենյակում տեղի ունեցավ հանձնախմբի նախաձեռնությամբ հրատարակված երեք գրքերի շնորհանդեսը: Միջոցառմանը ներկա էին «ՀՈՒՍԿ»-ի իրանցի բարեկամները:

Բացման խոսքով հանդես եկավ Հայ Դատի հանձնախմբի անդամ Սարինե Թորոսյանը` ներկայացնելով գրքերը, հեղինակներին, թարգմանիչներին եւ օրվա բանախոսներին:

Առաջին գիրքը, որի մասին խոսեց իրանցի անվանի պատմաբան Քավե Բայաթը, Ռիչարդ Հովհաննիսյանի «Հայաստանի Հանրապետության պատմությունը» կոթողային աշխատությունն է, որն անգլերենից պարսկերեն էր թարգմանել Աթուսա Սամիին: Գիրքը հրատարակվել է 2018-ին` Հայաստանի Առաջին Հանրապետության հիմնադրման 100-ամյակի առթիվ:

Պատմաբան Քավե Բայաթը, ներկայացնելով գիրքը, նշեց, որ այն պատմական եւ փաստավավերագրական չափազանց արժեքավոր ստեղծագործություն է, որը ներկայացնում է Առաջին համաշխարհային պատերազմի տարիներին Կովկասի իրավիճակը, Հայոց ցեղասպանությանը հաջորդած տարիներին Հայաստանում ստեղծված իրավիճակը եւ Հայաստանի Հանրապետության կերտման, հաստատման եւ կայացման գործընթացը:

Երկրորդ գիրքը`  Հայ Դատի հանձնախմբի նախագահ Իսակ Յունանեսյանի հեղինակած «Նեմեսիսի գործողություն»-ն է: Գիրքը ներկայացրեց Անի Հովսեփյանը՝ նշելով, որ հեղինակը համապարփակ ներկայացրել է Սողոմոն Թեհլիրյանի հերոսական գործողությունն ու Նեմեսիսի գործողությունը` ընդհանրապես: Գրքի մասին խոսեց նաեւ Իրանի խորհրդարանում Թեհրանի եւ հյուսիսային իրանահայության պատգամավոր, դոկտ. Կարեն Խանլարյանը` «Նեմեսիսի գործողությունը» ներկայացնելով արդարության իրագործման եւ մարդկային իրավունքի վերականգնման համատեքստում:

Երրորդ գիրքը 1915թ. Հայոց ցեղասպանության ականատեսներից` գերմանա-շվեյցարացի Յակոբ Կոնցլերի «Արյան ու արցունքի հովտում» պատմափաստագրական աշխատություն է, որը պարսկերեն է թարգմանել դոկտ. Սայիդ Ֆիրուզաբադին: Գիրքը ներկայացրեց թարգմանիչը` նշելով, որ ուսումնասիրության հեղինակն անկողմնակալ հայացքով է անդրադարձել Հայոց ցեղասպանությանը: Նա ընդգծեց, որ նման փաստագրական տվյալների հավաքագրումը շարունակվում է նաեւ այսօր՝ կարեւորելով Թուրքիայում ծպտյալ հայերի մասին բացահայտումները: