Ալյուրի հարստացումը կարող է հանգեցնել հաստ աղիքի քաղցկեղի

Սպառողների ազգային ասոցիացիայի անդամները դեմ են ալյուրը ֆոլաթթվով հարստացնելուն ու այդ օրենքի ընդունմանը:

Ասոցիացիայի նախագահ Ռուբեն Հայթյանը այսօր լրագրողների հետ զրույցում նախ թվարկեց տասնյակ եվրոպական զարգացած երկրների անուններ, որոնք չեն մտել ալյուրի հարստացման գործընթացի մեջ: Չիլիում ու Նոր Զելանդիայում է իրականացվել ալյուրի հարստացման գործընթացը, որտեղ էլ կատարված ուսումնասիրությունները պարզել են, որ հաստ աղիքի քաղցկեղով հիվանդացությունն ավելացել է, համապատասխանաբար, երեք և երկու անգամ:

«Մեզ հայտնի է, որ առողջապահության նախկին նախարար Դերենիկ Դումանյանը կտրուկ հրաժարվել էր այդ գործընթացից»,- ասաց նա:

Ասոցիացիայի անդամները նշում էին, որ պարտադիր չէ հացի մեջ այդ հավելումներն ավելացնել, որովհետև այն մարդիկ, որոնց անհրաժեշտ է ֆոլաթթու, կարող են ձեռք բերել հատուկ սննդամթերք, որում այն պարունակվում է:

«Վիտամինների սպառումը իրենց բնական վիճակում շատ ավելի ապահով է ու արդյունավետ: Մեր մարմինն իրականում կարիք ունի ոչ թե սինթետիկ ֆոլաթթվի, այլ բնական ֆոլատի»,- ասացին ասոցիացիայի անդամները:

Կենսաֆիզիկոս Աշոտ Կարապետյանը նշեց. «Այս օրենքի ընդունումը կարող է հանգեցնել իսկական ազգային աղետի, որովհետև Չիլիում ու Կանադայում այն հանգեցրել է հաստ աղիքի քաղցկեղի: Բնական ֆոլաթթվի կարիքը ունի մարդու օրգանիզմը, բայց օրգանիզմը չի կարող կարիք ունենալ սինթետիկ ֆոլաթթվի, որը կարող է հանգեցնել բացասական հիվանդագին երևույթների»: