Ամեն օր հեզաճկուն կերպով բարձրանում են առաջին անհրաժեշտության ապրանքների գները. Նաիրա Զոհրաբյան

Այսօր ԱԺ նիստում, երբ ՏՄՊՊՀ նախագահ Արտակ Շաբոյանը ներկայացնում էր ՏՄՊՊՀ 2015 թ. ծրագիրը, ԱԺ ԲՀԿ խմբակցության ղեկավար Նաիրա Զոհրաբյանը հարց ուղղեց նրան առաջին անհրաժեշտության մթերքների գների բարձրացման մասին:

«ՀՀ քաղաքացիներն ամեն օր ականատեսն են լինում, թե ինչպես խանութներում, սուպերմարկետներում շատ հեզաճկուն քայլերով, հինգ, տասը կամ տասնհինգ դրամներով բարձրանում են ապրանքների գները: Խնդիրն այն է, որ Հայաստանում ուղղակիորեն «միջին խավ» հասկացությունը վերցել, որոնց համար գների հեզաճկուն աճը նշանակություն չունի, բայց այն մեծ նշանակություն ունի աղքատ խավի վրա: Ինչպե՞ս եք տեսնում այս հարցի լուծումը»,- հարցրեց պատգամավորը:

Նա նաև բարձրաձայնեց սպառողների իրավունքների խախտման դեպքերի մասին, երբ խանութներում մի մեծ գրություն են փակցնում, թե «Գնված ապրանքը ետ չի վերցվում»:

Արտակ Շաբոյանը նշեց, որ գնագոյացման խնդիրները գտնվում են ՏՄՊՊՀ ուշադրության կենտրոնում այնքանով, որքանով խնդիրը վերաբերում է բարձր կենտրոնացվածություն ունեցող շուկաներին, որտեղ իրենց գործունեությունն են իրականացնում խոշոր ընկերությունները` սահմանելով չհիմնավորված բարձր գներ:

«Մենք խոշոր ընկերությունների գործունեությունը մշտապես մեր ուշադրության կենտրոնում են պահում, մենք հսկում ենք այդ ընկերությունների գնային քաղաքականությունը: Մենք հետևում ենք գնագոյացման խնդիրներին»,- ասաց նա: