Հող զիջելու մասին ակնարկած Սաջադ Քարիմն ասում է, թե իրեն սխալ են հասկացել

ԱԺ-ում ավարտվեց ԵՄ-Հայաստան խորհրդարանական համագործակցության 15-րդ նիստը, որից հետո նիստը համանախագահողներ` ՀՀԿ-ական Սամվել Ֆարմանյանն ու Բրիտանիան ներկայացնող Սաջադ Քարիմը հանդես եկան համատեղ մամուլի ասուլիսով: Մինչ այդ Սաջադ Քարիմը Հայաստանի կողմից հողերի զիջման մասին էր ակնարկել:

Yerkir.am-ը Սաջադ Քարիմից հետաքրքրվեց, թե վերջին անգամ ե՞րբ է եղել Ադրբեջանում, այնտեղից ի՞նչ տպավորություն է ստացել և արդյո՞ք Ադրբեջանին ու Թուրքիային հողերի զիջման հարց ուղղել է, ինչպես այստեղ` Երեւանում, նման բան ակնարկեց:

Մինչ նա կպատասխաներ, ՀՀԿ-ական Սամվել Ֆարմանյանը նշեց, որ հնարավոր է թյուրընկալման կամ տարընթերցման պահ է եղել: «Պարոն Քարիմը հողերի զիջման հարց չի բարձրացրել, խոսքը վերաբերել է այլ բանի, նա փոխանցել է թուրքական կառավարության տեսակետը»,- ասաց Սամվել Ֆարմանյանը:

Սաջադ Քարիմը հավելեց. «Հուսով եմ, որ Սամվելը շտկեց թերընկալումները` մեկնաբանությունների հետ կապված»: Այնուհետև անդրադառնալով այն հարցին, թե երբ է վերջին անգամ եղել Ադրբեջանում ու ինչ տպավորություն է ստացել այդ երկրից, նա պատասխանեց. «Ես ստանձնեցի Եվրախորհրդարանի Հարավային Կովկասի պատվիրակության նախագահությունը մի քանի ամիս առաջ: Պատճառներից մեկը, որ իմ թեկնածությունը առաջադրվեց, այն էր, որ ես երբևէ որևէ ուղղակի ներգրավվածություն Հարավային Կովկասի երկրներում չեմ ունեցել: Դա ձեզ կարող է զարմացնել, բայց առաջին անգամ է, որ ես այցելում եմ այս տարածաշրջան, իսկ Հայաստանն առաջին երկիրն է, որ այցելել եմ: Վաղը հեռանում եմ շատ դրական արդյունքներով ու տպավորություններով: Կհեռանամ ձեր երկրի խորքային ու հստակ ընկալմամբ»:

Նա հավելեց, որ շարունակելու է սատարել Հայաստան-ԵՄ հարաբերություններին, որոնցում Հայաստանն իր ուրույն տեղը կունենա:

Իսկ իր ազգության հետ կապված` Սաջադ Քարիմը նշեց. «Ես, որպես բրիտանացի, սովոր չեմ նման հարցերի պատասխանել: Ես բրիտանացի եմ, ծնվել եմ Լանկաշիրում, անգլիացի եմ, բրիտանացի ու եվրոպացի: Ընտանիքս ծագումով Հարավային Ասիայից է, որի մեծ հատվածներ մաս են եղել բրիտանական կայսրության: Ընտանիքիս անդամները մոտ 150 տարի աշխատել են բրիտանական կայսրության կառավարման մարմիններում»:

Հիշեցնենք, որ մինչ այս Սաջադ Քարիմը ԱԺ-ում նման հարցադրում է արել. «Մենք համաձայն ենք, որ սահմանը պետք է բացվի առանց նախապայմանների: Պարզապես մեկ տարի առաջ թուրք դեսպանն ասաց, որ արձանագրությունները սառեցված են, թեև դա էլ վախճան չէ: Ուզում ենք իմանալ ձեր տեսակետը դրա վերաբերյալ, մենք հասկանում ենք, որ որոշ դիվանագիտական աշխատանք է տեղի ունեցել, ես չեմ վիճարկի բարի կամքի դրսևորումը, բայց չե՞ք կարծում, որ հայկական կողմից օրինակ քայլ արվի և, ասենք, ոչ ԼՂՀ-ն, ինչ-որ ուրիշ տարածքների զիջումը հարցին օգնի»: