Կառավարությունը սկսում է համայնքների խոշորացման գործընթացը

Կառավարության այսօրվա նիստում որոշում կայացվեց հայաստանյան մի շարք համայնքներում անցկացնել համայնքների խոշորացման վերաբերյալ հանրաքվե: Լոռու մարզում հանրաքվե կանցկացվի Թումանյանի, Մարցի, Քարինջի, Լորուտի, Շամուտի, Աթանի, Ահնիձորի համայնքներում:

Սյունիքի մարզում հանրաքվե կանցկացվի Շինուհայրի, Տաթևի, Հալիձորի, Հարժիսի, Սվարանցի, Խոտի, Տանձատափի, Քաշունիի համայնքներում: Տավուշի մարզում` Դիլիջանի, Հաղարծինի, Թեղուտի, Գոշի, Աղավնավանքի, Խաչարձանի, Հովքի համայնքներում, ևս հանրաքվե կանցկացվի:

Նախագիծը ներկայացնող ՏԿԱԻ նախարար Արմեն Երիցյանը նշեց, որ հանրաքվեի անցկացման համար ԿԸՀ-ին հատկացվելու է 42 միլիոն 586 հազար 78 դրամ, իսկ ոստիկանությանը` 1 միլիոն 956 հազար դրամ։

Վարչապետ Հովիկ Աբրահամյանն էլ նշեց, որ նախագծով սկիզբ է դրվում համայնքների խոշորացմանը, որը որևէ դժգոհութոյւն և վիճելի հարց առաջ չի բերել: «Սա լինելու է շարունակական»,- ասաց նա: