«Բա ինքն ինչի՞ համար է, թող անձամբ ձևակերպի Ավետիսյանների պահանջը»

Yerkir.am-ն ավելի վաղ հայտնել էր, որ Գյումրին ներկայացնող ՀՀԿ-ական պատգամավոր Սուքիաս Ավետիսյանը մեզ հետ զրույցում ասել էր, որ ինքը չի հասկանում, թե Ավետիսյանների հարազատների՝ Գևորգ Կոստանյանին հասցեագրված պահանջը կոնկրետ ո՞րն է:

Yerkir.am-ը փորձեց «Ասպարեզ» ակումբի նախագահ Լևոն Բարսեղյանից ճշտել՝ ինքը կարո՞ղ է այնպես ձևակերպել Ավետիսյանների հարազատների պահանջը, որպեսզի անհասկանալի կետեր չմնան ո՛չ Սուքիաս Ավետիսյանի, ո՛չ էլ, առավել ևս, Գևորգ Կոստանյանի և կոմպետենտ այլ մարդկանց համար:

«Էդ մարդիկ պարտավոր չեն գրագետ լինել և գրագետ կերպով ձևակերպել իրենց պահանջը: Դրա փոխարեն էդ պատգամավորն ինքը կարող է անձամբ ձևակերպել պահանջը: Համ էլ այսքան ժամանակ ասվում է, թե որն է պահանջը, դեռ անհասկանալի հարցե՞ր են մնացել»,- նշեց Բարսեղյանը: Նա նշեց, որ պահանջը նույնն է` թող Պերմյակովին հանձնեն հայկական հետախուզական մարմիններին և իրականացվի արդար դատավարություն:

«Մինչ այս ինչ եղել է, կարելի է ասել, որ ոչինչ է: Միայն մի քանի կցկտուր բաներ կան, ուրիշ ոչինչ: Հանցագործության բացահայտումն օդից կախված է: Մերոնք էլ ՌԴ իրավապահ մարմինների արտահաստիքային աշխատողներն են»,- ասաց Բարսեղյանը: Նրա կարծիքով՝ մեր իրավապահ մարմինները բաց են արտահայտվում այնքան, ինչքան թույլատրվում է, իսկ ինչը չի թույլատրվում, մնում է գաղտնի: