Առողջապահության նախարարը PR-ի խնդիր չի տեսնում, ինքն է անձամբ պատասխանում թեժ գծի զանգերին

Այսօր ՀՀ առողջապահության նախարար Արմեն Մուրադյանը, լրագրողների հետ զրույցում պատասխանելով այն հարցին, թե արդյո՞ք անվստահության կամ փիար գործոնով է պայմանավորված այն աննախադեպ հանգամանքը, որ հենց նախարարն է պատասխանում առողջապահության նախարարության թեժ գծի զանգերին, պատասխանեց. «Անձնական փիարի հետ կապված  խնդիր բացարձակապես չեմ տեսնում, դա քաղաքացիների հետ անմիջական շփման օպերատիվ միջոց է: Նաև սա մոտեցման հարց է, այլ ոչ` անվստահության գործոն»:

Նախարարը հավելեց, որ թեժ գիծը ստանում է տարեկան 12 հազար զանգ, որը վկայում է այն մասին, որ թեժ գծի հանդեպ վստահությունն աճել է մոտ երկուսուկես անգամ: Միաժամանակ, նախարարը նշեց, որ թեժ գիծը չպետք է դառնա միայն բողոքի գիծ, այլ օպերատիվ տեղեկատվություն ստանալու գործիք:

«Թեժ գծի հիմնական զանգերը ինֆորմացիոն բնույթ են կրում: Գովելի է, որ բնակչությունը վստահում է թեժ գծին և հետաքրքրվում  իր իրավունքներով»,- ասաց նախարարը: