Հայաստանն արտահանման ծավալների աճ է արձանագրել՝ Չինաստանի հաշվին «Ժողովուրդ»

«Ժողովուրդ» թերթը գրում է. Պաշտոնական վիճակագրության համաձայն՝ անցած տարի Հայաստանից արտահանվել է 1 միլիարդ 519 միլիոն 295 հազար դոլարի ապրանք: Անցած տարվա համեմատ՝ արտահանումն աճել է 2,7 տոկոսով կամ նույն է թե՝40 միլիոն 547 հազար դոլարով:

Սակայն ուշագրավն այն է, որ Հայաստանի արտահանման հիմնական շուկաների ուղղությամբ անկում է արձանագրվել: «Ժողովուրդ»-ը պարզեց, որ հիմնական աճն արձանագրվել է դեպի Չինաստան իրականացվող արտահանման ծավալների ավելացման հաշվին: Եթե 2013-ին դեպի Հայաստանից Չինաստան է արտահանվել 68 միլիոն 838 հազար դոլարի ապրանք, ապա 2014-ին այդ թիվն ավելացել է 2,5 անգամ և հասել 170 միլիոն 954 հազար դոլարի:

Այսպիսով՝ ողջ աշխարհին ապրանք մատակարարող Չինաստանն ինքն է Հայաստանից ինչ-որ ապրանքներ ներկրում: Ասվածը որքան որ կատակ է, նույնքան էլ լուրջ, քանի որ տվյալ դեպքում Հայաստանից Չինաստան արտահանվող հիմնական ապրանքը պղնձի խտանյութն է, որի գինն այս տարվա սկզբից կտրուկ նվազել է: Ուստի առաջիկայում դեպի Չինաստան արտահանման ցուցանիշն էլ կնվազի»: Մանրամասները՝ թերթի այսօրվա համարում: