Ռազմական ինստիտուտում երկու գնդապետ է պաշտոնանկ արվել. մանրամասներ` կուրսանտի դաժան սպանությունից

Yerkir.am-ի տեղեկություններով` Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության դեպքից հետո պաշտոնանկ են արվել ինստիտուտի զորքերի ծառայության կազմակերպման գծով տեղակալ, գնդապետ Արմեն Մզիկյանը և ինստիտուտի մեկ այլ տեղակալ, շտաբի պետ Մարկոսյանը:

Հիշեցնենք, որ երեկ ՀՀ նախագահ Սերժ Սարգսյանը հաստատեց ինստիտուտի պետ, գեներալ-լեյտենանտ Մարտին Կարապետյանի հրաժարականը:

Կուրսանտի սպանության գործով մեղադրյալներից մեկի հայրը, որը նույնպես ինստիտուտի պետի տեղակալներից է, արդեն ազատվել է պաշտոնից:

Կուրսանտի սպանության վարկածներից մեկի համաձայն` համակուրսեցիները ցանկացել են իրենց ենթարկեցնել Հայկազին, սակայն դա նրանց չի հաջողվել: Մեր տեղեկություններով` դեպքը տեղի է ունեցել գիշերը, երբ ինստիտուտում բոլորը քնած են եղել: Վիճաբանության ընթացքում համակուրսեցիները դաժանորեն ծեծել են Հայկազին: Նախնական վարկածի համաձայն` նրան ձեռքերով կամ բարձով  խեղդել են (դատաբժշկական փորձաքննության եզրակացությամբ նշվում է, որ մահը վրա է հասել շնչահեղձ լինելու հետևանքով), և տղան մահացել է:

Ի դեպ, Հայկազի մարմնին, բացի բազմաթիվ վնասվածքներից, եղել են նաև երակների կտրվածքներ, ինչը վկայում է, որ «հնարամիտ» հանցագործները փորձել են ցույց տալ, թե իբր նա ինքնավնասում է կատարել, սակայն, երևի հասկանալով, որ այդ տարբերակն այնքան էլ «հավատ չի ներշնչի», նրան կախել են մարզահրապարակի պտտաձողից: Դեպքից հետո տղաներն անմիջապես թաքցրել են իրենց վրա մնացած արյան հետքերը: Սակայն առավոտյան դեպքի վայր ժամանած առաջին քննիչն անմիջապես նկատել է, որ «փնթի» սպանություն է կատարվել:

Ի դեպ, մեր տեղեկություններով, գործով մեղադրյալները հրաժարվում են իրենց առաջադրված մեղադրանքից, այսպես ասած` «չոր ատկազ են կանգնում»:

Նշենք նաև, որ առաջիկայում ինստիտուտում պաշտոնանկությունները կշարունակվեն, իսկ դեպքի պատճառները և մյուս հանգամանքները կպարզի քննությունը: