Վարդան Պետրոսյանը դատապարտվեց 5 տարվա ազատազրկման

Կոտայքի մարզի ընդհանուր իրավասության առաջին ատյանի դատարանի դատավոր Վաղինակ Մկրտչյանը քիչ առաջ հրապարակեց դերասան Վարդան Պետրոսյանի մասնակցությամբ տեղի ունեցած վթարի գործով դատավճիռը:

Դերասանը դատապարտվեց 5 տարվա ազատազրկման: Նշենք, որ մեղադրող դատախազը դերասանի համար պահանջել էր վեցուկես տարվա ազատազրկում: Դատարանը Վարդան Պետրոսյանին նաեւ 2 տարով զրկեց վարորդական իրավունքից, ինչպես նաև բավարարեց Հայկազ Կարապետյանի քաղհայցը` 1 մլն 200 հազար բռնագանձելով:  Դերասանը լուռ հեռացավ:

Վարդան Պետրոսյանի մասնակցությամբ վթարը տեղի էր ունեցել 2013-ի հոկտեմբերի 20-֊ին Եղվարդ–Երևան ավտոճանապարհին: Պետրոսյանին մեղադրանք էր առաջադրվել Քրեական օրենսգրքի 242-րդ հոդվածի 3-րդ մասով` ճանապարհային երթևեկության կամ տրանսպորտային միջոցների շահագործման կանոնները խախտելը, որն անզգուշությամբ առաջացրել է երկու կամ ավելի մարդու մահ։

Առաջադրված մեղադրանքում դերասանն իրեն մեղավոր չէր ճանաչել: