Վրացի ''գրքամոլը'' դատապարտվեց 10 տարվա ազատազրկման

Երևանի Կենտրոն և Նորք-Մարաշ վարչական շրջանների դատարանը, դատավոր Մնացական Մարտիրոսյանի նախագահությամբ, հրապարակեց ՀՀ ազգային գրադարանից և Երևանի պետական համալսարանի գրադարանից առանձնապես խոշոր չափերի գողությունների գործով դատավճիռը: Ըստ այդմ` Վրաստանի քաղաքացի Վաժա Ազարիաշվիլին դատապարտվեց 10 տարվա ազատազրկման՝ գույքի կեսի բռնագրավմամբ:

Ամբաստանյալ Երվանդ Ղամբարյանը դատապարտվեց 5 տարվա, ամբաստանյալ Դավիթ Ղամբարյանը 4,5, ամբաստանյալներ Վարդան Եղիազարյանն ու Կարեն Հովհաննիսյանը՝ 4-ական տարվա ազատազրկման: Ամբաստանյալ Հասմիկ Դուրգարյանը դատապարտվեց 5 տարվա պայմանական ազատազրկման՝ նույնքան տարվա փորձաշրջանով, իսկ ամբաստանյալ Աբգար Հովսեփյանը՝ 500 հազար դրամ տուգանքի:

Դատավճռի վրա էական ազդեցություն կունենար այն հանգամանքը, եթե  Վաժա Ազարիաշվիլին գրքերը վերադարձներ Հայաստան, սակայն դա տեղի չունեցավ, քանի որ գրքերն, այնուամենայնիվ, Հայաստան չհասան:

Հիշեցնենք, որ Վաժա Ազարիաշվիլին և մյուս ամբաստանյալները մեղադրվում էին անցյալ տարվա դեկտեմբերի 26-ին ՀՀ Ազգային եւ ԵՊՀ գրադարանների գրապահոցներից 150 միավոր հնատիպ գրքերի գողության մեջ: