Որոշ երթուղայիններ առավոտից չեն աշխատում, պատճառը քաղաքապետարանի նախաձեռնած աշխատանքներն են

Այսօր առավոտյան երևանցիների մի մասն աշխատանքի կամ այլ վայր հասնելու համար ստիպված է եղել երկու տրանսպորտ փոխել, քանի որ որոշ երթուղայիններ չեն աշխատել: Օրինակ` 5 համարի ավտոբուսի վարորդը կանգառում կանգնածներին հորդորում էր չսպասել 83 համարի երթուղային տաքսուն, քանի որ գիծը հանել են, չի աշխատելու:

Yerkir.am-ի հետ զրույցում Երևանի քաղաքապետարանի լրատվության և հասարակայնության հետ կապերի վարչության պետ Արթուր Գևորգյանը հայտնեց, որ պատճառը մի քանի երթուղագծերի շտկման աշխատանքներն են:

«Որոշ երթուղագծերի փոփոխություններ են իրականացվում, և առաջիկա ժամերի ընթացքում մենք տեղեկատվություն կտարածենք, թե որ համարը որով է փոխարինվելու»,- ասաց նա:

Գեւորգյանը հերքեց առավոտից տարածված այն տեղեկությունները, թե գծատերերը կամ վարորդները գործադուլ են հայտարարել: