Ես մարդ եմ, ով չի կարող լսել, թե ինչպես են երեխա սպանել. Պերմյակովի նախկին փաստաբան

Գյումրիում Ավետիսյանների ընտանիքի 7 անդամներին դաժանաբար սպանած ռուս զինվոր Վալերի Պերմյակովի պաշտպանությունը ստանձնած, այնուհետև նրան պաշտպանելուց հրաժարված փաստաբան Թամարա Յայլոյանը երեկ երեկոյան է վերադարձել Մոսկվայից, որտեղ էր ռուսական «Առաջին ալիք» հեռուստաընկերության հրավերով: Yerkir.am-ը փաստաբանի հետ զրուցեց Փաստաբանների պալատի կողմից նրա դեմ հարուցված կարգապահական վարույթի և գործի հետ կապված այլ մանրամասների մասին:

-Խնդրում եմ` խոսեք Ձեր դեմ հարուցված կարգապահական վարույթի մասին: Որպես փաստաբանի վարքականոնի խախտում` նշվում է այն, որ Դուք Պերմյակովի պաշտպանությունը ստանձնել եք Շիրակի մարզի քննչական վարչության պետի տեղակալի հրավերով: Այսինքն` ենթադրվում է, որ վարույթն իրականացնող մարմինն է պաշտպան ընտրել կասկածյալի համար:

-Ըստ իս` վարույթն իրականացնող մարմինը չէ ինձ հրավիրել` պաշտպանություն իրականացնելու: Քրեական վարույթն իրականացնում է ռուսական կողմը, իսկ ինձ  ռուսական կողմը չի հրավիրել: Կարծում եմ` Փաստաբանների պալատը քննություն կանի, և համապատասխան որոշում կլինի: Ես իմ բոլոր փաստարկները կներկայացնեմ պալատին:  

Ինչ վերաբերում է պաշտպանությունից հրաժարվելուն, ապա ասեմ:  Երբ նա որպես կասկածյալ էր, ես մասնակցել եմ քննությանը, ավարտել եմ բոլոր գործողությունները, իսկ նրա հարցաքննության ընթացքում  մի երկու անգամ դուրս եմ եկել,  որովհետև ինձ վատ եմ զգացել ու դրանից հետո որոշել եմ, որ այլևս չպետք է մասնակցեմ: Ես, այո, հասկացել եմ, որ վարքագծի կանոնագրքի խախտում եմ կատարում: Որոշ մարդիկ, որ գրում էին «Ֆեյսբուք»-ում, մատնացույց անում դա,  այնպես չէ, որ ես չեմ գիտակցել: Բայց երբ պետք է ընտրությունը աշխատանքի և մարդկային արժեքների միջև լինի, ես չգիտեմ` ուրիշները ինչպես,  բայց ես մարդկային արժեքներն եմ ընտրում:

-Իսկ ինչու՞ ի սկզբանե չհրաժարվեցիք Պերմյակովին պաշտպանելուց:

-Ես  բազմաթիվ  սպանությունների գործերով մասնակցել եմ: Ի սկզբանե  չմտածեցի, որ էսքան ծանր կլինի: Մտածեցի, որ ամեն դեպքում ինչ-որ մեկը պիտի պաշտպանի,  ու դա կարող էր անել և' մեկ ուրիշը, և' ես:

-Կարգապահական վարույթ հարուցելու որոշման մեջ, որպես վարքագծի խախտում, նշվում է նաև այն, որ հրապարակել եք Պերմյակովի նախաքննական ցուցմունքը:

-Այդ մասը հանվել է, գտել են, որ ինձնից առաջ արդեն իսկ հրապարակված են եղել այդ տվյալները:

-Երբ հայտնի դարձավ, որ գործով փաստաբան է ներգրավված, Փաստաբանների պալատը գաղտնի էր պահում Ձեր ինքնությունը` անվտանգությունից ելնելով:

-Ցանկալի չէր այդ պահին հրապարակելը, դուք գիտեք`  Գյումրիում ինչպիսի վիճակ էր: Իհարկե, հետո դատաքննության ընթացքում փաստաթղթերի հրապարկման ժամանակ, որպես կասկածյալ հարցաքննության տեսագրումը նայելու ժամանակ  կիմացվեր, որ ես եմ եղել նրա փաստաբանը, բայց այդ ժամանակ լարվածությունն անցած կլիներ, և մարդիկ դա կհասկանային:

-Իսկ այդ ընթացքում Դուք իսկապես անվտանգության խնդիր ունեցե՞լ եք, սպառնալիքներ եղե՞լ են:

-Զանգեր եղան որոշ տեղերից, թե իմացել են, որ ես եմ: Սպառնալիքներ չեն եղել, եղել են միայն ակնարկներ` որ իմացել ենք, կամ հարցրել են` ես ե՞մ, թե՞ ոչ:  Եվ հաստատ, եթե մեկը կամ մի քանիսն իմացել են, արդեն  ամբողջ քաղաքը կիմանա, մարդիկ արդեն իրենք իրենց համար ինչ-որ մեկնաբանություններ կանեին, և  հնարավոր տարբերակ էր, որ ինձ կարող էր վտանգ սպառնալ: Կարող էր չլինել ոչինչ, կարող էր և լինել: Ես մտածեցի, որ եթե արդեն ինչ-որ բաներ իմացվել են, ավելի լավ է ես ինքս  ասեմ` ինչ է եղել: Ես էլ ասել եմ:

-Իսկ գուցե վտանգից զգուշանալո՞վ եք հրաժարվել Պերմյակովի պաշտպանությունից:

-Չէ, դա չի եղել պատճառը:  Այդ պահին կային խոսակցություններ, որ մեր կողմին պիտի տային [Պերմյակովին], իսկ եթե տային, ապա այսպիսի մեծ աղմուկ չէր էլ լինի: Ես գիտակցաբար հրաժարվել եմ: Ես հասկացել եմ, որ մարդ եմ, կին եմ, որը չի կարող նստել ու լսել, թե ինչպես են երեխա սպանել:  Եթե գտնեն, որ դրա համար ինձ պետք է պատասխանատվության ենթարկել, ապա ես պատրաստ եմ դրան: 

Մի բան էլ ասեմ, ես չգիտեմ` ռուսական կողմն ինչպես է բացատրել իմ հրաժարվելը, երբ ես ասել եմ, որ հրաժարվում եմ նրա պաշտպանությունից: Երևի նա էլ գրել է, որ հրաժարվում է իմ ծառայություններից:

-Կա նաև տեսակետ, թե հենց ռուսական կողմն է հրաժարվել Ձեր ծառայություններից, քանի որ չի ցանկանում, որ «ավելորդ տեղեկություններ»  դուրս գան:  

-Ոչ, այդպես չէ: Ռուսական կողմի քննիչը եկել էր իմ աշխատանքի վայրը և ասաց, որ ամսի 14-ին ներկայանամ ռուսական ռազմաբազա` խափանման միջոց կալանքը քննելու համար: Ես ասացի, որ չեմ կարող, ես հոգեբանորեն պատրաստ չեմ:  Ես իմ հայտարարությունների մեջ էլ նշել եմ, որ ցանկալի է, որ նաև մեր կողմից լիներ փաստաբան: Ես չկարողացա, բայց եթե կա մեկը, ով ի վիճակի է, լավ կլինի, որ նրա պաշտպանությունն իրականացնի:

-Դու այժմ ունե՞ք տվյալներ, որոնք չեք կարող հրապարակել` նախաքննության գաղտնիությունից ելնելով:

-Չէ, այդպիսի տվյալներ չկան: Ես ոչ թե հրապարակել եմ նախաքննական տվյալներ, այլ միայն բացատրել եմ, թե ինչու եմ հրաժարվել Պերմյակովի պաշտպանությունից:

-Խնդրում եմ` նաև պատմեք, թե, ի վերջո, ինչո՞ւ Անդրեյ Մալախովի հեղինակած հաղորդումը չնկարահանվեց:

-Մալախովի օգնականները եկան ինձ մոտ, հրավիրեցին Մոսկվա` ասելով, որ հաղորդում են ուզում նկարահանել, և դա նաև հայերի շահերից է բխում: Զանգեցի Փաստաբանների պալատ, ասացի, որ սենց բան կա, ինձ կանչեցին Երևան, խորհրդակցություն եղավ, որոշվեց, որ ևս երկու փաստաբան պետք է գան ինձ հետ: Մենք գնացինք, պատրաստեցինք, իմացանք, որ երեխան մահացել է: Ասացին, որ հաղորդման ամբողջ նպատակը երեխային միասին օգնելն էր: Նաև հայ համայնքի ներկայացուցիչներ էին եկել, ռուս բավականին հայտնի իրավաբաններ էին հրավիրված: Ես մտածում եմ, որ գուցե մտավախություն ունեցան,  որ լսարանը զայրացած կլինի և հաշտեցման հասնելու իրենց տարբերակը չի ստացվի: Այդ պահին մենք բոլորս էլ զայրացած էինք և միգուցե ավելի բորբոքված խոսեինք, շատ ավելին ասեինք, քան նախատեսում էին: Մալախովը եկավ ներողություն խնդրեց, ասաց, թե` քննարկեցինք ղեկավարության հետ, ասացին, որ չենք կարող նկարել հաղորդումը:

Հարցազրույցը` Ա.Կ.