Իմքայլական պատգամավորներն ասում են՝ մենք կընդունենք ԶԼՄ-ների մասին օրենքը, դուք էլ խելոք աշխատեք էդ կարգավորումներով. Էլինար Վարդանյան

«Զանգվածային լրատվության մասին» օրենքում փոփոխություններ և լրացումներ կատարելու մասին՝ իմքայլական պատգամավորների հեղինակած նախագծով փորձ է արվում «անանուն աղբյուր» հասկացությունը ծածկել․ խորհրդարանում հրավիրված քննարկման ժամանակ հայտարարեց ԱԺ «Հայաստան» խմբակցության անդամ Էլինար Վարդանյանը։

«Նախատեսվում են նաև լրատվամիջոցների հավատարմագրման հետ կապված կարգավորումներ, մասնավորապես՝ նախատեսվում է, որ լրագրողի հավատարմագրումը պետական մարմիններում կմերժվի, երբ չեն պահպանվի այս օրենքով նախատեսված կարգավորումները։ Նաև ֆինանսական հաշվետվությունների հետ կապված կարգավորումներ կան, որոնք ինձ համար անհասկանալի են, որովհետև, այսպես, թե այնպես, լրատվամիջոցները ֆինանսական հաշվետվություն ներկայացնում էին։ Լրացուցիչ հոդվածով ծանրաբեռնելու բուն նպատակը չգիտեմ՝ որն է», - ասաց Էլինար Վարդանյանը։

Նա նշեց, որ ամենաանընդունելի քաղաքականությունը, որ որդեգրել են այսօրվա իշխանությունները, շահառուների հետ չքննարկելն է օրենքի փոփոխությունները, որոնք վերաբերում են անմիջապես ԶԼՄ-ներին։ 

«Ասում են՝ մենք կընդունենք ԶԼՄ-ների մասին օրենքը, դուք էլ խելոք աշխատեք էն կարգավորումներով, որոնք մենք նախատեսել ենք»,- ասաց Էլինար Վարդանյանը։

Նշենք, որ նախագծի հեղինակները իմքայլական պատգամավորներ Արթուր Հովհաննիսյանը, Վահագն Հովակիմյանը, Թագուհի Ղազարյանը և Սարգիս Խանդանյանն են։ Նրանք թեև հրավիրված են քննարկմանը, սակայն չեն ներկայացել։