Հակառակորդի կրակոցից 19-ամյա զինծառայող է զոհվել

ԼՂՀ ՊԲ մամուլի ծառայությունից հայտնում են, որ դեկտեմբերի 8-ին ղարաբաղա-ադրբեջանական հակամարտ զորքերի շփման գծի արևելյան ուղղությամբ տեղակայված զորամասերից մեկի պաշտպանության տեղամասի մարտական հենակետում հակառակորդի կողմից արձակված կրակոցից մահացու հրազենային վիրավորում է ստացել զինծառայող` 1995թ. ծնված Գարիկ Արտեմի Իսպիրյանը:

Դեպքի մանրամասները պարզելու համար տարվում է քննություն: ԼՂՀ պաշտպանության նախարարությունը կիսում է կորստյան ծանր վիշտը և իր զորակցությունը հայտնում Գ. Իսպիրյանի ընտանիքի անդամներին, հարազատներին և ծառայակիցներին:

Ավելի վաղ հայտնել էինք, որ հակառակորդն այսօր դիվերսիոն ներխուժման փորձ է  կատարել, ինչի  հետևանքով տվել է 5-7 զոհ: Առայժմ հայտնի չէ՝ արդյո՞ք հայ զինծառայողը զոհվել է դիվերսիոն գործողության ընթացքում, թե՞ ոչ: