Թե ինչով են պայմանավորված թանկացումները. Գալուստ Սահականի «հայտնագործությունը»

Այսօր լրագրողների հետ զրույցում ԱԺ նախագահ Գալուստ Սահակյանը, անդրադառնալով դրամի արժեզրկմանը եւ դրան հետեւող թանկացումներին, հայտարարեց, թե դա մտահոգում է իշխանություններին:

Լրագրողների դիտարկմանը, որ թանկացումները կարող են բողոքի նոր ալիք առաջացնել հանրության շրջանում, նա արձագանքեց. «Եթե մարդը վատ է ապրում, պիտի բողոքի էլ: Բայց ալիքի հետ մի քիչ զգույշ վերաբերվեք, դա թողեք Փաշինյանին»:

Գալուստ Սահակյանի կարծիքով` դրամի արժեզրկման պատճառները կարող են տարբեր լինել: «Փորձում են ներկայացնել, թե միտումնավոր է տեղի ունենում, բայց համաշխարհային շուկան պիտի նայես, թանկացումներն ուրիշ տեղից են գալիս: Միշտ էլ տրադիցիոն այդպես է կարծես թե եղել` Նոր տարվա օրերն են գալիս, աշխարհի տարբեր երկներում դեպի էժանացում է գնում, որովհետև շրջանառությունն է մեծանում, մեզ մոտ թանկացում է գնում, որովհետև շրջանառությունը շատ փոքր է լինում»,- կարծիք հայտնեց նա:

Գալուստ Սահակյանի խոսքով` թանկացումներն ու տնտեսական վիճակն իրենց մտահոգում են, որովհետև «դա իշխանության իմիջի հետ է կապված, որ մարդիկ լավ ապրեն»:

Հարցին, թե իշխանությունները գնաճ կանխատեսո՞ւմ էին, պատասխանեց, որ «վերլուծականներ կան, կանխատեսումներ կան, բայց դրանով ժողովրդին չես կշտացնի»: