Եթե Րաֆֆի Հովհաննիսյանը ցանկանում է շարժումը տեմպի առումով արագացնել… . ԲՀԿ-ական պատգամավոր

ԲՀԿ խմբակցության պատգամավոր Միքայել Մելքումյանը, այսօր լրագրողների հետ զրույցում խոսելով Րաֆֆի Հովաննիսյանի այն հայտարարության մասին, թե եռյակը միասնական չէ, ասաց, որ «Ժառանգություն» խմբակցությունը եռյակի ձևաչափում ներկայացուցիչներ ունի, և եթե իրենք իսկապես խնդիրներ են տեսնում, կամ եթե դժգոհություն կա եռյակից, ապա թող գան ու բարձրաձայնեն:

«Եթե ինքը, ոճի առումով, կողմ է ավելի կտրուկ քայլերով առաջ գնալուն, ապա դա պետք է ընդունվի եռյակի առաջնորդների կողմից, և առաջ շարժվեն: Եթե կա համագործակցության ծրագիր, որն արդեն հաստատված է, ապա պետք է դրանով առաջ շարժվել»,- ասաց պատգամավորը:

Դիտարկմանը, որ Րաֆֆի Հովհաննիսյանը հայտարարել է նաեւ, որ «Ժառանգությունը» հեռուստատեսություն, փող և մեքենա չունի, որ մարդկանց հանրահավաքի բերի` նկատի ունենալով ԲՀԿ-ին, Միքայել Մելքումյանն արձագանքեց, որ այս պահի դրությամբ` եռյակը մոբիլիզացրել է խորհրդարանական և արտախորհրդարանական ուժերը, և երբ ասում են` ուժերի մոբիլիզացիա, միայն մարդկանց նկատի չունեն, այլ այն բոլոր հնարավորությունները, որոնք առկա են:

«Եթե Րաֆֆի Հովհաննիսյանը ցանկանում է շարժումը տեմպի առումով արագացնել, չեմ ասում` դեմ եմ կամ կողմ եմ, թող գա քննարկի, ո՞վ է դեմ: Կա եռյակի ինստիտուտ, ուրեմն որոշումները այդտեղ են կայացվում: Նրա ներկայացուցիչները չե՞ն եռյակում, եթե իր ներկայացուցիչների հետ խնդիր ունի, ինչ ասեմ…»,- ասաց Միքայել Մելքումյանը:

Նշենք, որ ԲՀԿ խմբակցության պատգամավոր Տիգրան Ուրիխանյանը նշեց, որ զերծ է մնում Րաֆֆի Հովհաննիսյանի հայտարարությունները մեկնաբանելուց: