Անցած տարվա համեմատ` ավելի քիչ էլեկտրաէներգիա ենք արտադրել

Ազգային վիճակագրական ծառայությունը ժամեր առաջ հրապարակել է Հայաստանի մակրոտնտեսական ցուցանիշները 2014 թվականի առաջին 10 ամիսների համար:

Տնտեսական ակտիվության ցուցանիշը, նախորդ տարվա 10 ամիսների համեմատ, աճել է 4.2 տոկոսով: Աճի տեմպի դանդաղումը շարունակվում է արդյունաբերության ոլորտում՝ պայմանավորված հիմնականում հանքարդյունաբերության ոլորտում առկա` պղնձի գնային քաղաքականությամբ: Աճն այս ոլորտում կազմել է 2.2 տոկոս:

Գյուղատնտեսությունն աճել է 6.5, առևտրի շրջանառությունը` 4.7 տոկոսով: Միջին գնաճն այս տարվա առաջին 10 ամիսներին կազմել է 2.9, իսկ միջին ամսական աշխատավարձն աճել է մոտավորապես 8 տոկոսով:

Արտահանումը շարունակում է հետ ընկնել ներմուծման ծավալներից: Արտահանումն առաջին 10 ամիսներին աճել է 2.9, ներմուծումը՝ 3.8 տոկոսով: Հետնապահների շարքում կրկին շինարարությունն է, այս ոլորտում նվազումը կազմել է 4.4 տոկոս: Շարունակվում է նվազում արձանագրվել նաեւ էլեկտրաէներգիայի արտադրության ոլորտում: Նախորդ տարվա նույն ժամանակահատվածի համեմատ` մենք արտադրել են մոտավորապես 1 տոկոսով քիչ էլեկտրաէներգիա: