Բժիշկների համեմատ` հարուստ եմ, շատ հարուստների համեմատ` աղքատ. առողջապահության նախարար

Այսօր` կառավարության նիստից հետո, առողջապահության նախարար Լևոն Ալթունյանը լրագրողների հետ զրույցում անդրադարձավ վարչապետի հանձնարարականին` կրճատել ՊՈԱԿ-ների թիվը: Նախարարը նշեց, որ մեկ ամիս է պետք բոլոր ուսումնասիրությունները ոլորտում ավարտելու և բարեփոխումներ իրականացնելու համար: Լրագրողները ոլորտի մի քանի խնդիրների վրա հրավիրեցին նախարարի ուշադրությունը, այն է` բժիշկների հետ կապված կոռուպցիոն դրսևորումները:

Նախարարը հարցրեց. «Դուք բժշկին կոնյակ կամ ծաղիկ տալը համարում եք կոռուպցիոն դրսևորո՞ւմ»: Լրագրողները հարցրեցին` ինքը վերցրե՞լ է նվերներ հիվանդներից: Նախարարը պատասխանեց, որ թեև ծաղիկ իրեն չեն նվիրել, բայց կոնյակ նվիրել են, և ինքը վերցրել է:

Հարցին` արդյո՞ք ինքն ամենահարուստն է կառավարությունում, Ալթունյանը պատասխանեց. «Դժվար է ասել: Բժիշկների համեմատ` հարուստ եմ, շատ հարուստների համեմատ` աղքատ»:

Նախարարը նշեց, որ հնարավոր համարում է առողջապահության ոլորտում ապահովագրության համակարգի ներդրումը, սակայն, դրա հետ կապված, ներկայումս քննարկումներ չեն գնում: