ՀՊՃՀ-ի կամերային նվագախումբն այսուհետ կկոչվի Սերգեյ Աղաջանյանի անունով

ԵրՊԻ-ՀՊՃՀ-ի կամերային նվագախմբի 50-ամյակին և նվագախմբի ղեկավար, կոմպոզիտոր Սերգեյ Աղաջանյանի 85-ամյակի առթիվ ՀՊՃՀ (Պոլիտեխնիկ)-ում տեղի է ունեցել տոնական միջոցառում։ Միջոցառմանը ներկա էին նվագախմբի անդամները, ովքեր ժամանել էին աշխարհի տարբեր երկրներից` տոնելու հարազատ նվագախմբի տոնը:

Ներկա էին նաև ԵրՊԻ-ի շրջանավարտ, կոմպոզիտոր Երվանդ Երզնկյանը և կոմպոզիտոր Մարտին Վարդազարյանը։ Նրանք Պոլիտեխնիկի և նրա երաժշտական ավանդույթների մասին  հիշողությունները ներկայացրեցին ներկաներին և երաժշտական ողջույն հղեցին հանդիսատեսին, իսկ Երևանի պետական կոնսերվատորիայի «Կոմիտաս» երգչախումբը կատարեց Սերգեյ Աղաջանյանի ստեղծագործություններից։

Միջոցառմանը ներկա էր Սերգեյ Աղաջանյանի կինը և նրանց 10-ամյա թոռնիկը՝ տաղանդավոր ջութակահար Միքայել Աղաջանյանը, ով նույնպես հանդես եկավ ելույթով։

Միջոցառման ավարտին ՀՊՃՀ ռեկտորի պաշտոնակատար Հովհաննես Թոքմաջյանը հայտարարեց, որ ՀՊՃՀ գիտական խորհրդի որոշմամբ` կամերային նվագախումբն այսուհետ կկոչվի Սերգեյ Աղաջանյանի անունով: Հավաստագիրը նա անձամբ հանձնեց Սերգեյ Աղաջանյանի թոռնիկին և կնոջը։ Թոքմաջյանը շնորհակալագրեր հանձնեց նաև լարային քառյակի անդամներին։

Հոբելյանական միջոցառումների շարքում, նվագախմբի երաժիշտ-մասնակիցների նախաձեռնությամբ, նախատեսվում է տպագրել գիրք, որում զետեղված են լինելու այս տարիներին կատարված աշխատանքներն ու անցած պատմությունը, ինչպես նաև կնկարահանվի վավերագրական ֆիլմ: