Պոլիտեխնիկի ֆիզիկայի ամբիոնի վարիչի հերթն էլ եկավ

Այսօր տեղի է ունեցել Հայաստանի պետական ճարտարապետական համալսարանի ռեկտորատի նիստ: Նիստի ժամանակ, ի թիվս այլ որոշումների, որոշվել է նաև բուհի պրոռեկտոր Աշոտ Խաչատրյանին ազատել ֆիզիկայի ամբիոնի վարիչի պաշտոնից:

Yerkir.am-ի հետ զրույցում ՀՊՃՀ ռեկտորի պաշտոնակատար Հովհաննես Թոքմաջյանը նշեց, որ Խաչատրյանը հասարակական հիմունքներով էր զբաղեցնում ամբիոնի վարիչի պաշտոնը: «Խաչատրյանը շարունակում է մնալ պրոռեկտորի պաշտոնում: Պարզապես նա չէր հասցնում երկու գործ միաժամանակ անել: Հիմա ամբիոնի վարիչ կնշանակվի մեկը, ով կհասցնի գործերը կարգավորել»,- ասաց նա:

Ի դեպ, Խաչատրյանը ՀՊՃՀ տեղեկատվական և հեռահաղորդակցական տեխնոլոգիաների վարչության պետ Վլադիմիր Խոյեցյանի քեռին է, ով վերջերս բողոքել էր բուհի նորանշանակ աշխատակազմի ղեվավարի դեմ, և որի տունը խուզարկվել էր Թոքմաջյանի անվան հետ առնչվող վիրտուալ սկանդալի գործի շրջանակներում:

Թոքմաջյանը նշեց, որ Խաչատրյանին պաշտոնից ազատելն ամենևին էլ կապ չունի Խոյեցյանի հետ. «Խնդիրն իրավական դաշտում է, իրավապահներն են զբաղվում այդ հարցով, և այս ամենը զուտ կադրային հարցեր են»:

Թոքմաջյանը տեղեկացրեց նաև, որ Խաչատրյանի փոխարեն ամբիոնի վարիչի պաշտոնակատար է նշանակվել Արեգ Սահակյանը: