Դեռեւս չհամաձայնեցված հարցեր կան. Ռուբեն Հակոբյանը՝ հանրահավաքից առաջ

ԱԺ ավանդական ճեպազրույցում, դիմելով ԱԺ «Ժառանգություն» խմբակցության ղեկավար Ռուբեն Հակոբյանին, լրագրողները նշեցին, որ, կարծես, տրամադրության փոփոխություն կա, քանի որ արդեն երեկ ԲՀԿ որոշ ներկայացուցիչներ հայտարարեցին, որ իշխանափոխությունը պարզամիտ լուծում է:

Պատգամավորը, այդ դիտարկմանն ի պատասխան, ասաց. «Տրամադրության փոփոխություն նկատել ե՞ք, ես չեմ նկատել, որ տրամադրության փոփոխություն կա, ավելի ստույգ և վերջնական` եթե ներկա լինեք հանրահավաքին, կտեսնեք, որ տրամադրության փոփոխություն չկա»:

Հարցին` եռյակին հաջողվե՞լ է միասնական օրակարգ ձևավորել, Ռուբեն Հակոբյանը պատասխանեց. «Դեռևս կան չհամաձայնեցված հարցեր, որոնք թողել ենք այսօրվա վերջում կամ հենց հանրահավաքի պահին ճշտել: Հիմնական հարցերը ճշտված են, հիմնական նպատակը իշխանափոխությունն է, որով միասին գնում են երեք քաղաքական ուժերը: Իհարկե, որոշ հարցեր, որոնք խմբագրման ընթացքի մեջ են, և' մինչև միտինգի պահը, և' միտինգի պահին կունենան իրենց լուծումները: Այնպես որ` չեմ կարծում, որ առանց օրակարգի ենք գնում»:

Yerkir.am-ի հարցին` արդյո՞ք դրվելու է Սերժ Սարգսյանի հրաժարականի միասնական պահանջ, պատգամավորը պատասխանեց, որ դրված է իշխանափոխության հարց, և եռյակը ուշադրություն է դարձնելու ոչ թե լոզունգներին, այլ գործընթացներին:

«Պետք է ակնկալել` ինչպես հասնել արդյունքի, ոչ թե որքան գեղեցիկ լոզունգներ կհնչեն, որպեսզի չլինեն այնպիսի գործողություններ, որոնք ճանապարհի կեսին կդատապարտվեն: Եթե կգա այն պահը, որ այդ լոզունգը պետք է դարձնենք ուղենիշ, ուրեմն` դա կդարձնենք»,- ասաց նա:

Ինչ վերաբերում է, թե ինչու եռյակը քննարկման չի դրել «Ժառանգության» պատգամավոր Զարուհի Փոստանջյանի` իշխանափոխության օրակարգը, ասաց, որ դա Զարուհի Փոստանջյանի անձնական նախաձեռնությունն էր, որը չի քննարկվել «Ժառանգության» վարչությունում, ուստի չի քննարկվել նաեւ եռյակի ձևաչափում: