Էրդողանի կուսակցության փոխնախագահը ցավակցել է հայերին 1915 թվականի դեպքերի կապակցությամբ

Մալաթիայում տեղի ունեցած` «Մալաթիան՝ Մալաթիայի հայերի աչքով» կոնֆերանսի ժամանակ «Արդարություն և զարգացում» կուսակցության փոխնախագահ, Մալաթիայից պատգամավոր Օզնուր Չելիքը 1915 թվականի դեպքերի կապակցությամբ ցավակցել է հայերին: Այս մասին հայտնում է Haberler-ը:

Վերհիշելով Էրդողանի ցավակցական ուղերձը՝ Չելիքն ասել է. «Նոր Թուրքիա» կառուցելիս անհնար է շրջանցել 1915 թվականի դեպքերը: Ինչպես նախագահը, այնպես էլ մենք ցավակցում ենք զոհվածների թոռներին: Ծնունդով մալաթիացի Հրանտ Դինքի հոգին նույնպես լուսավոր լինի: Բոլորս պետք է միմյանց նկատմամբ հանդուրժող լինենք: Անկախ ազգությունից՝ բոլորս պետք է եղբայրության սերմեր ցանենք: Մենք միասին դարձանք Թուրքիա: Հուսով եմ, որ «Նոր Թուրքիան» կկառուցենք միասին` միմյանց հասկանալով, նախկին մեր ցավերը համատեղելով և ցավերն իրար հետ մրցակցության չդնելով: Մեր տարբերությունները մեր հարստությունն են»: