Մի հատ էլ նենց մուննաթ ես գալիս. վարչապետը՝ փոխնախարարին

Այսօր կառավարության նիստում ՀՀ կրթության ու գիտության փոխնախարար Մանուկ Մկրտչյանը ներկայացրեց որոշման նախագիծ, որով առաջարկվում է «Ուսուցչի օր» տոնի կապակցությամբ ուսուցիչների մեծարման և արժևորման երեկո կազմակերպելու նպատակով ՀՀ կրթության և գիտության նախարարությանը 2014 թվականին հատկացնել 10048,0 հազար դրամ` «Երևանի թատրոնի և կինոյի պետական ինստիտուտ» ՊՈԱԿ-ին տրամադրելու համար:

Փոխնախարարն այնպես էր կմկմում ու ցածրաձայն դադարներով խոսում, որ նրա զեկույցից ոչ ոք բան չհասկացավ:

Վարչապետը զարմացավ. «Պարո'ն Մկրտչյան, չեմ հասկանում` ի՞նչ եք ասում: Այդ թուղթը հնարավոր չէ՞ նորմալ ներկայացնել: Նորմալ ներկայացրեք, մենք էլ հասկանանք: Այսինքն` ես հասկանում եմ, այստեղ նստածները հասկանում են, բայց մյուսները... Մի քիչ նորմալ բացատրեք՝ ի՞նչ եք ուզում»:

Մանուկ Մկրտչյանը նշեց, որ Ուսուցչի տոնը հոկտեմբերի 5-ին պատշաճ կազմակերպելու համար կինոյի եւ թատրոնի ինստիտուտին պետք է գումար հատկացնեն` տասը միլիոն դրամ:

«Հա, մի հատ էլ նենց մուննաթ ես գալիս մեզ վրա»,- արձագանքեց Հովիկ Աբրահամյանը: