Հպարտ եմ, որ մեր նախագահը հանդիպմանը գնացել էր «երկաթե շերեփով». ԼՂՀ պաշտպանության նախարար

«Ադրբեջանը պարզապես շանտաժի միջոցով փորձել է մեզ վիրտուալ վախեցնել՝  ռազմական տեխնիկան առաջ քաշելով` փորձելով հասկացնել, որ հենց վաղը սկսելու է պատերազմը։ Սակայն դա արդյունք չի տվել, քանի որ այդ շանտաժը կարճ է տևել, մեր գործողությունների արդյունքում արդեն օգոստոսի 5- ից հակառակորդը հետ է քաշել ուժերը»,-ասաց նա։

Իսկ թե որքան կտևի սահմանում տիրող խաղաղությունը հարցին նախարարը պատասխանեց.«Ամեն օր սպասում եմ պատերազմի։ Բանակի ամենօրվա գործունեությունն ուղղված է պատերազմին պատրաստ լինելուն»:

Հակոբյանի խոսքով՝ հուլիսի վերջի և օգոստոսի սկզբի հակառակորդի իրակացարած 7 դիվերսիոն գործողություններն իրականացրել են Ադրբեջանի հատուկ ստորբաժանման անդամները, որոնք պատրաստվել են Կիպրոսում։ Հիշեցնենք, որ այս ընթացքում հակառակորդը տվել է 36 զոհ: Այս թիվը հաստատեց նաև նախարարը՝ նշելով, որ կոնկրետ անուն-ազգանուններ կան։

Նշենք, որ նախորդ տարվա նույն ժամանակահատվածի համեմատ այս տարի շուրջ երեք անգամ ավելացել է հակառակորդի կողմից արձակված կրակոցների թիվը։ Մովսես Հակոբյանի խոսքով՝ եթե նախորդ տարվա այս ժամանակահատվածում հակառակորդն արձակել է 7560 կրակոց, ապա այս տարի այդ թիվը հասնում է 17903-ի:

«Մենք երբեք անիմաստ չենք կրակում` կրակում ենք այն ժամանակ, երբ դրա անհրաժեշտությունը լինում է, և կրակելուց էլ փորձում ենք կրակել դիպուկ»,-ասաց նա։

Խոսելով Ադրբեջանի, Հայաստանի և Ռուսաստանի նախագահների` Սոչիում կայացած եռակողմ հանդիպումից, նախարարը նշեց.«Հպարտ եմ, որ մեր նախագահը հանդիպմանը գնացել էր «երկաթե շերեփով» և հպարտ եմ նրա համար, որ դա նաև մեր զինվորների շնորհիվ էր»:

Նախարարն անդրադարձավ նաև Ռուսաստանի կողմից Ադրբեջանին պարբերաբար զենք վաճառելուն։ Նա նշեց, որ թեև դա վատ է, սակայն դա իրեն չի վախեցնում։