Մենք ավելի խստի էինք կողմնակից. Գևորգ Կոստանյանը՝ Լյուքս Ստեփանյանի գործով դատավճռի մասին

Զինծառայող Լյուքս Ստեփանյանի մահվան մեջ մեղադրվող Դավիթ Խաչատրյանին 17 տարվա ազատազրկման դատապարտելու` Տավուշի մարզի ընդհանուր իրավասության դատարանի կայացրած վճիռը հասարակության շրջանում բուռն քննարկման թեմա է դարձել: Պաշպանական կողմը պնդում է, սակայն, որ գործի դատաքննության ընթացքում խախտվել է ամբաստանյալի անմեղության կանխավարկածը, իսկ վճիռը կայացվել է տուժող կողմին հանգստացնելու համար:

Խաչատրյանին առաջադրված մեղադրանքի մասին խոսելիս ՀՀ գլխավոր դատախազ Գևորգ Կոստանյանը հայտարարել էր, որ կատարվել են բոլոր անհրաժեշտ քննչական գործողությունները, ձեռք են բերվել մեղադրանքը, մեղավորությունը հիմնավորող անհերքելի ապացույցներ: Մինչդեռ, պաշտպանական կողմի կարծիքով, Խաչատրյանի անմեղության կանխավարկածը խախտողներից է նաև հենց Գևորգ Կոստանյանը:

Այսօր yerkir.am-ի լրագրողը ՀՀ գլխավոր դատախազ Գևորգ Կոստանյանից հետաքրքրվեց՝  ըստ նրա` համաչա՞փ է Խաչատրյանի նկատմամբ կայացված վճիռը: «Եթե նկատել եք` հատկապես իմ պաշտոնավարման ժամանակահատվածում, ես երբեք որևէ որոշում չեմ կայացրել հասարակական կարծիքը կամ հասարակական դիրքորոշումը նկատի ունենալու տեսակետից: Այսինքն՝ եթե կա հասարակական պահանջ, որ` այ սա անմեղ է, եկեք իրեն ազատենք, ես երբեք դրան չեմ գնում: Այսինքն՝ ինձ ծնողների դիրքորոշումը, իրենք գո՞հ են պատժաչափից, գոհ չե՞ն պատժաչափից, շատ չի մտահոգում»,- ի պատասխան ասաց Գևորգ Կոստանյանը՝  հավելելով. «Համենայն դեպս,  մենք խոսում ենք հետևյալի մասին` կատարվել է հանցագործություն, երկու անձ տուժել է, և երբ դատախազը միջնորդում է պատժաչափը և պատժատեսակը, դա չի որոշում օդի մեջ՝ եկեք այս դեպքում սա միջնորդենք: Երբ դուք նայեք նմանատիպ դեպքերում դատական պրակտիկան, թե ինչ պատժողական քաղաքականություն է իրականացվում, յուրաքանչյուր դեպքում դատական պրակտիկան` գումարած, տվյալ դեպքում, մեղմացնող և ծանրացնող հանգամանքները հաշվի առնելով է պատժաչափը որոշվում, միջնորդվում համապատասխանաբար դատարանին: Այսինքն՝ մենք չենք ներկայացնում, որ այս դեպքում ծնողները դեմ են կամ ծնողներին լռեցնելու խնդիր կա, եկեք խիստ պատիժ... Խիստ չէ: Պատիժը խիստ չէ, պատիժը համաչափ է, որովհետև մենք խոսում ենք երկու հանցագործության մասին ՝ մի արարք, երկու հանցագործություն, և դրա համար ես համարում եմ, որ այդ պատիժը նորմալ է և համաչափ: Ավելին ասեմ, մենք ավելի խիստ պատիժ էինք միջնորդել, դատարանն ավելի մեղմ տվեց, այսինքն մենք ավելի խստին էինք կողմնակից»:

Հարցին՝ ի՞նչ գնահատական կտա մեղադրանքի վերաբերյալ իր հայտարարություններին, որոնք առիթ հանդիսացան, որ պաշտպանական կողմը խոսի անմեղության կանխավարկածի մասին, Գևորգ Կոստանյանը պատասխանեց. «Ես հայտարարությանը գնահատական չեմ տալիս: Ընդամենը մի բան ասեմ: Ես դատախազ եմ: Բա իմ գործը հենց անձի մեղավորության մասին խոսելն է, չէ՞: Այսինքն՝ եթե ես այլ կերպ վարվեմ, դա կլիներ տարօրինակ: Բա ես հենց դատախազ եմ նրա համար, որ հենց պիտի պնդեմ իմ մեղադրանքը: Եթե ես մեղադրանքը հիմնավոր չհամարեի, մեղադրանքը չէի առաջադրի՝ ա, բ՝ մեղադրանքից կհրաժարվեի, չէ՞: Այդպե՞ս չէ: Բա ես հենց դատախազ եմ նրա համար, որ եթե համարում եմ՝ մեղադրանքը հիմնավոր է, պնդում եմ այդ մեղադրանքը: Իմ սահմանադրական գործառույթն է այդպիսին»: