Վալերի Օսիպյանի դեմ քրեական գործ չի հարուցվել

Ընդամենը մեկ շաբաթ առաջ ամբողջ մամուլը թնդաց, թե Երևանի ոստիկանապետ Վալերի Օսիպյանի դեմ քրեական գործ է հարուցվել Հատուկ քննչական ծառայությունում (ՀՔԾ):

Yerkir.am-ի հետ զրույցում այս լուրը հաստատեց նաև ՀՔԾ մամուլի քարտուղար Միքայել Ահարոնյանը: Սակայն նա այդպես էլ չպատասխանեց, թե, մասնավորապես, Քրեական օրենսգրքի ո՞ր հոդվածի հատականիշներով է մեղադրանք առաջադրվել փոխոստիկանապետին` պատճառաբանելով, թե դա նախաքննական գաղտնիք է:

Սակայն պարզվում է, որ ոչ միայն Օսիպյանի դեմ մեղադրանք չի առաջադրվել, այլև գաղտնիք չէ Քրեական օրենսգրքի հոդվածը, որի հիման վրա գործը հարուցվել է:

Այսպիսով` գրավոր հարցում ուղարկելուց հետո ՀՔԾ մամուլի պատասխանատուից այսօր ստացանք  հետևյալ պատասխանը. «Պաշտոնեական լիազորություններն անցնելու դեպքի առթիվ ՀՀ հատուկ քննչական ծառայությունում` ՀՀ քրեական օրենսգրքի 308-րդ հոդվածի 1-ին մասի հատկանիշներով, հարուցվել է քրեական գործ և կատարվում է նախաքննություն: Վերը նշված գործով ինչպես Վ. Օսիպյանին, այնպես էլ որևէ այլ անձի դեռևս մեղադրանք չի առաջադրվել»: