«Հարսնաքարի» գործով վերաքննիչ բողոքները մերժվեցին. ամբաստանյալի մոր համար շտապօգնություն կանչեցին

Քիչ առաջ ՀՀ վերաքննիչ քրեական դատարանը, դատավոր Սերգեյ Չիչոյանի նախագահությամբ, հրապարակեց «Հարսնաքարի» գործով 6 ամբաստանյալների ներկայացրած բողոքների վերաբերյալ որոշումը:

Դատարանը մերժեց ամբաստանյալների և նրանց պաշտպանների բողոքներն ու անփոփոխ թողեց Ավան և Նոր Նորք վարչական շրջանների ընդհանուր իրավասության դատարանի կայացրած վճիռը:

Հիշեցնենք, որ առաջին ատյանի դատարանի դատավոր Դավիթ Հարությունյանի կայացրած վճռով` 6 ամբաստանյալները դատապարտվել էին 12-ական տարվա ազատազրկման և 100 հազարական դրամ տուգանքի:

Դատարանից  Yerkir.am-ի լրագրողը հայտնում է, որ, ի տարբերություն այս գործով առաջին ատյանի դատարանի հրապարակած որոշման օրը տեղի ունեցած իրավիճակի, այսօրվա վճռի հրապարակումը հանգիստ մթնոլորտում անցավ: Միայն վճռի հրապարակումից հետո վատացավ ամբաստանյալ Գարիկ Մարգարյանի մոր` տիկին Նունեի ինքնազգացողությունը: Նրան չեն կարողանում դուրս բերել նիստերի դահլիճից, նա անընդհատ բղավում է: Շտապօգնության բրիգադ են հրավիրել: