Գործարարներին տրված ժամկետը մոտենում է. Հովիկ Աբրահամյանը չի շտապում արդյունքների մասին խոսել

Վարչապետ Հովիկ Աբրահամյանը գործարարների հետ հայտնի հանդիպման ժամանակ նրանց մինչեւ հուլիսի 1-ը ստվերից դուրս գալու ժամանակ էր տվել:

Մայիսի 15-ին` կառավարության նիստի ժամանակ էլ, Հովիկ Աբրահամյանը հայտարարել էր, որ գործարարները պետք է պահպանեն խաղի կանոնները, իսկ եթե չպահպանեն, ապա կառավարությունն իր լծակներով կստիպի անել դա:

Հուլիսի 1-ը մոտենում է, իսկ ի՞նչ արդյունքներ է գրանցել կառավարությունը:  Yerkir.am-ի թղթակիցը տեղեկացնում է, որ, անդրադառնալով այս հարցին, Հովիկ Աբրահամյանը նշեց. «Մեր արդյունքները մենք կգրանցենք հուլիսի 1-ից: 10-օրյակը մեկ ֆինանսների նախարությունը հաշվետվություն է տալու, նաեւ` հանրությանը, թե որ հարկատուի մոտ ինչ տենդենց կա: Բոլորը, այդ թվում` մամուլը, տեղյակ են լինելու: Մենք լինելու ենք հետեւողական, եւ անպայման մեր պայմանավորածությունները կառավարությունը կատարելու է: Այն հարկատուները, ովքեր կփորձեն պայմանավորվածությունները խախտել, շատ կոշտ դիրքորոշում ենք ցուցաբերելու»: