Սա այն ընդդիմությունն է, որը մենք ուզում ենք. Վահրամ Բաղդասարյանն ուրախ է

ԱԺ ՀՀԿ խմբակցության ղեկավար Վահրամ Բաղդասարյանը ուրախ է, որ քառյակը ներկայացրել է առողջ առաջարկություններ: Նա նշեց, որ ներկայացված առաջարկները ՀՀԿ-ի կողմից արդեն հնչել էին` մի մասը` կառավարության ծրագրի ժամանակ, մյուս մասը` ՀՀԿ-ական պատգամավորների ելույթներում:

Բաղդասարյանի խոսքով` ներկայացված բոլոր առաջարկություններն էլ քննարկման առարկա են, օրինակ`  վերացնել պարտադիր կուտակայինը, որի հետ կապված, Վահրամ Բաղդասարյանի գնահատականով, լուրջ առաջընթաց կա:

Ինչ վերաբերում է տեսանկարահանող և լուսանկարահանող սարքերի հարցը վերանայելուն, ապա, պատգամավորի խոսքով, լսումներ են կազմակերպվել, և այդ հարցն էլ պետք է ուսումնասիրվի: Շրջանառության հարկի նվազեցման հարցը, ըստ Բաղդասարյանի, նույնպես ՀՀԿ-ն է բարձրացրել ու ավելի լավ առաջարկություններով հանդես եկել:

Դիտարկմանը, թե ստացվում է, որ քառյակը ՀՀԿ-ի կետե՞րն է ավելացրել, Բաղդասարյանը պատասխանեց. «Դրա համար էլ շատ ուրախ եմ: Ես ասում եմ, որ առողջ առաջարկություններ են արվել ընդդիմության կողմից, և սա արդեն այն ընդդիմությունն է, որը մենք ուզում ենք, որոնց հետ կկարողանանք հարցեր քննարկել, հարցեր լուծել»:

Վահրամ Բաղդասարյանը նշեց, որ քառյակի համաձայնագրում կա մի կետ, որին ինքը դեմ է` այն, որ ընդդիմությունը, առանց պատասխանատվություն վերցնելու, վերահսկողական գործառույթներ է պահանջում: