Վահրամ Բաղդասարյանն ամբիոնից ներկայացնում է «ապուշ» բառի ստուգաբանությունը

ՀՀԿ խմբակցության ղեկավար Վահրամ Բաղդասարյանը խորհրդարանում իր ելույթի ընթացքում անդրադարձավ Հանրային հեռուստաընկերության գործունեության վերաբերյալ հնչեցված գնահատականներին: ՀԱԿ խմբակցության պատգամավոր Լևոն Զուրաբյանն իր ելույթում հայտարարել էր, թե հեռուստաընկերության հաղորդումները «իդիոտիզմի» են նմանվում:

«Շատ շահագրգիռ քննարկում է անցկացվում, տեսնում եմ, որ կա աշխատանք: Ուզում եմ անդրադարձ կատարել մի քանի ելույթների: Նախ ասեմ, որ «իդիոտ» բառի հայերեն հոմանիշը ապուշն է, որ բաղկացած է «ա» ժխտական ածանցից, «պուշ» արմատից, որը նշանակում է անուշադիր: Ես հիմա կանդրադառնամ «իդիոտիզմի» մի քանի դետալների, որոնք հնչեցին այս ամբիոնից»,- բացատրեց Բաղդասարյանը` հավելելով. «Մեր ընդդիմադիր գործընկերները Հանրային հեռուստաընկերությունը լավ չեն ունկնդրում, որովհետև ՀՀԿ խմբակցության անդամները հաճախ բողոքում են, որ ամբողջը ողողված է ընդդիմադիր գործիչներով, բոլոր ընդդիմադիր գործիչներն են լուսաբանվում: Ես իրենց շատ հանգիստ ասում եմ, որ դուք պետք է դրանից լավ զգաք, որովհետև մեր գործն իրենք են կատարում: Երբ իրենք երևում են էկրանին, մեզ ասելու քիչ բան է մնում»: