Իմ ու պարոն Թովմասյանի միջև անձնական խնդիր չի եղել. Արմեն Ռուստամյան

Արդեն տեղեկացրել ենք, որ արդարադատության նախկին նախարար Հրայր Թովմասյանը նշանակվել է ԱԺ աշխատակազմի ղեկավար:

Yerkir.am-ը ԱԺ ՀՅԴ խմբակցության ղեկավար Արմեն Ռուստամյանից փորձեց պարզել, թե ինչպե՞ս է պատկերացնում իրենց համատեղ աշխատանքը մեկ շենքում՝ հաշվի առնելով հայտնի իրադարձությունը:

«Ենթադրում եմ՝ «հայտնի իրադարձություններ» ասելով` Դուք ինչ նկատի ունեք: Իմ ու պարոն Թովմասյանի միջև անձնական խնդիր չի եղել, անձնական կամ անձնավորված միջադեպ էլ չի եղել: Ուրիշ բան, որ հետո, ցավոք, ով ոնց ուզել մեկնաբանել է: Դա իրականության խեղաթյուրում է` ես Հրայր Թովմասյանի անձին հասցեագրված ոչինչ չեմ ասել, հետևաբար, նրան վիրավորելու ցանկություն չէի կարող ունենալ: Ավելին ասեմ` վերջերս ես ու պարոն Թովմասյանը հանդիպել ենք ու մանրամասն զրուցել այս ամենի մասին: Կարծում եմ՝ հարցն այլևս գոյություն չունի, այն փակված է»,- ասաց Արմեն Ռուստամյանը:

Ինչ վերաբերում է Հրայր Թովմասյանի նշանակմանը, ՀՅԴ խմբակցության ղեկավարն ընդգծեց, որ նրան շատ վաղուց գիտի, և նրա պրոֆեսիոնալիզմն ու մարդկային հատկանիշները թույլ են տալիս ցանկացած նման պաշտոն զբաղեցնել:

«Ասեմ ավելին` պետականաշինության շատ հարցերում մեր մոտեցումները համընկնում են: Այս ամենից հետևում է, որ համատեղ աշխատանքի որևէ խնդիր ես չեմ տեսնում»,- ասաց Ռուստամյանը: