Սուրիկ Խաչատրյանը դա մեծ պաշտոն ա. Լիսկայի ինքնագոհ պահվածքը

«Արդյունքը պարզ է»,- լրագրողների հետ զրույցում այսպես արձագանքեց Գորիսի քաղաքապետի ընտրությունների վերաբերյալ հարցին Սյունիքի նախկին մարզպետ Սուրեն Խաչատրյանը, հետո ավելացրեց. «Խնդիր չունի, էլի»:

Հիշեցնենք, որ Գորիսի քաղաքապետի ընտրություններին առաջադրված թեկնածուներից մնացել է երկուսը` ՀՀԿ թեկնածու, Սուրեն Խաչատրյանի հովանավորյալ Վաչագան Ադունցը և անկուսակցական Հրայր Յոլյանը: Գորիսի քաղաքապետի ընտրությունները կայանալու են հունիսի 8-ին:

Yerkir.am-ի դիտարկմանը, թե` Ձեր հովանավորյալը խնդիր չունի՞, Սուրեն Խաչատրյանը պատասխանեց, որ նա բոլորի թեկնածուն է: «Ո'չ ախպերս ա, ո'չ հորեղբորս տղեն, ո'չ հորքուրիս տղեն, ո'չ էլ արյունակցական կապ ունեմ հետը»,- նաեւ հայտարարեց նա:

Լրագրողների այն հարցին, թե` ընկերներ էլ չե՞ք, պատասխանեց. «Ինքն իմ տարիքին էլ չի, որ ընկերներ լինենք, հարգված մարդ ա»:

Yerkir.am-ի դիտարկմանը, թե կարո՞ղ ենք փաստել, որ Սուրեն Խաչատրյանը ցանկանում է պաշտոնի վերադառնալ, նա պատասխանեց. «Խի պաշտոնի չե՞մ հիմա: Խաչատրյան Սուրիկը դա մեծ պաշտոն ա»:

Մեր ճշտող հարցին` Երևանո՞ւմ Սյունիքո՞ւմ, թե՞ ՀՀ-ում է նա բարձր պաշտոնի, արձագանքեց. «Եվ ընդհանրապես»: