Գործարարները ձգելու են գոտիները. Մանվել Բադեյան

ԱԺ ՀՀԿ խմբակցության պատգամավոր, գործարար Մանվել Բադեյանը կարծում է, որ Հովիկ Աբրահամյանի հետ հանդիպումից հետո գործարարները ստիպված են լինելու ձգել իրենց գոտիները:

Հիշեցնենք, որ օրեր առաջ ՀՀ վարչապետ Հովիկ Աբրահամյանը հանդիպել էր մոտ հարյուր գործարարների հետ` հորդորելով դուրս գալ ստվերից և աշխատել հավասար մրցակցության դաշտում: Այդ հանդիպմանը ներկա էին մի շարք պատգամավորներ, այդ թվում նաև` Մանվել Բադեյանը, ով բոլոր հրավիրված պատգամավորների պես ասում է, որ ինքը գործարար չէ, այլ միայն` սեփականատեր:

Լրագրողների հետ զրույցում նա նշեց, որ, դեռ 1996-ից սկսած, վարչապետերը  մի շարք հանդիպումներ են ունեցել գործարարների հետ, բայց, Մանվել Բադեյանի խոսքով, ամեն անգամ գործարարները ուսերը թափ տալով  են դուրս եկել գործադիրից` չհասկանալով, թե ինչ պահանջներն են իրենց ներկայացվում:

«Բայց էս անգամ հասկացել են, որովհետև ինքը`  Աբրահամյանը, իր ամբողջ կյանքում զբաղվել է տնտեսական գործունեությամբ`  մինչև Սովետական միության փլուզումը,  Սովետական միության փլուզումից հետո էլ երկար ժամանակ, այսինքն` ինքը շատ լավ պատկերացնում է գործարարության խնդիրները և նեղությունները, դրա համար էլ նրա ասած խոսքը գործարարների կողմից հարգանքով ընդունվեց»,- ասաց Մանվել Բադեյանը:

Այն հարցին` գործարարների ու հարկատուների շրջանում կա՞ն արտոնյալներ, նա պատասխանեց. «Կլինեն, կլինեն, բայց Հովիկ Աբրահամյանն ասաց, որ, անկախ դիրքից և անձնական կապերից, անկախ նախկին ծառայություններից, բոլորը պետք է փորձեն աշխատել հավասար մրցակցային պայմաններում»:

Yerkir.am-ի այն հարցին` ՀՀ օրենսդրությունը տալի՞ս է հնարավորություն ազնիվ աշխատելու, Մանվել Բադեյանը նշեց, որ ՀՀ օրենսդրությունը կատարյալին մոտիկ է, և դա ոչ թե իր գնահատականն է, այլ եվրոպական կառույցների: Ըստ նրա` ՀՀ օրենսդրությունը վատը չի, իր որակով  չի զիջում եվրոպական երկրների օրենսդրությանը, պարզապես խնդիրը կիրառման մեջ է:

Ըստ ՀՀԿ-ական պատգամավորի` կիրառումն էլ մոտավոր պատկերացումներով չէ, կան թվեր, ստատիստիկա: Մանվել Բադեյանի խոսքով`  հարկեր-ՀՆԱ հարաբերակցությունը  վերջին 10 տարիների ընթացքում աճել է 10 կետով` կազմելով  23-24 տոկոս:

«Եթե դրանից հանենք այն ոլորտները, որոնք առհասարակ չեն հարկվում, օրինակ` գյուղատնտեսությունը, որոշ այլ արտոնյալ ճյուղեր, նաև արտոնյալ անձանց, որոնք չեն հարկվում, ապա կտեսնենք, որ իրական հարկատուների վրա ընկած բեռը շատ մեծ է, և նրանք պատվով են դա անում և էլի պատրաստ են գոտիները ձգել, որովհետև գիտակցում են երկրի առջև կանգնած խնդիրները»,- ասաց Մանվել Բադեյանը:

Մեր այն հարցին, հնարավո՞ր է գործարարները գոտիները ձգելու արդյունքում թանկացնեն իրենց ապրանքները, նա պատասխանեց, որ թանկացումները խոսակցությունների արդյունքում չեն լինում, դրանք պայմանավորված են շուկայական գործիքներով: «Մի քանի հոգով ինչ խոսեցին իրար հետ` դա չի կարող ազդել գների վրա»,- ասաց պատգամավորը:

Այն հարցին` սեփականատեր պատգամավորները արդյո՞ք օրենքները փոփոխելիս չեն անելու դա` սեփական շահերից ելնելով, Մանվել Բադեյանը այսպես պատասխանեց. «Սեփականատեր են բոլորը` անկախ նրանից պատգամավոր են, թե չէ, դուք էլ եք սեփականատեր, ասենք` ձեր կոշիկի սեփականատերն եք, դուք էլ ձեր շահերն եք պաշտպանում, դուք էլ եք լոբբինգ անում,  հիմա ի՞նչ անենք, ձեզ արգելե՞նք թերթում աշխատել»: