Ռուսաստանի դատաիրավական համակարգը, իհարկե, կատարյալ չէ. Մանվել Բադեյան

ԱԺ ՀՀԿ խմբակցության պատգամավոր Մանվել Բադեյանը դժվարանում է որևէ կարծիք հայտնել գործարար Լևոն Հայրապետյանի շուրջ ստեղծված իրավիճակի մասին, որովհետև տեղյակ չէ գործից և չգիտի, թե ինչում են նրան մեղադրում:

«Անձամբ ճանաչում եմ Լևոն Հայրապետյանին, բավական բարեկիրթ, գրագետ մարդ է, իրականում` մեծ բարերար: Իսկ էն գործերը, ինչում նրան մեղադրում են, ես տեղյակ չեմ դրանից, որովհետև աշխատանքային որևէ առնչություն չեմ ունեցել նրա հետ»,- Yerkir.am-ի հետ զրույցում ասաց Մանվել Բադեյանը:

Մեր հարցին, թե ի՞նչ կարող է անել հայկական կողմը՝ Լևոն Հայրապետյանին ինչ-որ ձևով օգնելու համար, պատգամավորը պատասխանեց, որ քրեական գործ է հարուցվել , գործարարին ինչ-որ մեղադրանք է ներկայացվել, որից շատերը տեղյակ չեն, մանավանդ` տեղյակ չեն նրա գործունեությունից: «Այո, միշտ էլ հնարավոր է հասնել նրան, որ խափանման միջոցը փոխվի, որովհետև նա ծանր հիվանդ է, բայց որոշողը, իհարկե, Ռուսաստանի քննչական մարմիններն են»,- ասաց Մանվել Բադեյանը:

Հարցին` ի՞նչ կարծիք ունի Ռուսաստանի արդարադատության համակարգի վերաբերյալ, նա պատասխանեց. «Ռուսաստանի դատաիրավական համակարգը, իհարկե, կատարյալ չէ, և աշխարհում շատ քիչ կատարյալ դատաիրավական համակարգեր կան: Տարածված է այն կարծիքը, որ Նորվեգիայի, Շվեյցարիա, Սկանդինավյան մի քանի երկրների դատաիրավական համակարգերն են կատարյալ»: