Մեր կռիվը ձեզ հետ չէ, այլ իշխող ուժի. Մարուքյանի այս հայտարարությունը դուր չեկավ Սասուն Միքայելյանին

Հայտնել ենք, որ ԱԺ փոխնախագահների պաշտոնում  իշխանությունից առաջադրվել են Ալեն Սիմոնյանը և Լենա Նազարյանը, իսկ ընդդիմությունից Վահե Էնֆիաջյանը` ԲՀԿ-ից, և Մանե Թանդիլյանը` «Լուսավոր Հայաստան»-ից:

Թանդիլյանի թեկնածությունը ներկայացրեց «Լուսավոր Հայաստան» կուսակցության նախագահ Էդմոն Մարուքյանը: Անդրադառնալով իշխող «Իմ քայլը» խմբակցության այն պնդումներին, թե ԲՀԿ-ն ավելի շատ ձայն է ստացել, հետևաբար պետք է ընդդիմադիր փոխնախագահի պաշտոնը նրանց տրվի, նա ասաց. «Թանդիլյանը ստացել է 3600 ձայն, իսկ Վահե Էնֆիաջյանը նույն ընտրատեղամասում ստացել է 1200 ձայն: Ասեք` հիմա ո՞վ է որպես ընդդիմադիր ավելի շատ քվե ստացել»:

ԲՀԿ խմբակցության պատգամավորներից Արման Աբովյանը հակադարձեց. «Մենք ընտրում ենք ոչ թե տարածքային պատգամավորի, այլ ԱԺ փոխնախագահի: Թվերին նայելիս նայեք` որ քաղաքական ուժն ինչքան քվե է ստացել. ԲՀԿ-ն մեծությամբ երկրորդ քաղաքական ուժն է: Գոյություն ունի արդարության սկզբունք: Հիմնվելով արդարության սկզբունքի վրա` տեսնում ենք, թե որ քաղաքական ուժն է ընկալվում որպես ընդդիմադիր ուժ»:

Մարուքյանն էլ նշեց, որ շատ ձայների փաստարկն ինքը չի բերել, իշխող ուժն է բերել: «Բախտի բերմամբ, թե պատահմամբ` երկու թեկնածուները նույն տարածքում են առաջադրվել, և ժողովուրդն է  որոշել: Մենք չենք վիճարկում, որ ԲՀԿ-ն երկրորդ ուժն է, դա փաստ է: Մենք վիճարկում ենք այն հանգամանքը, թե փոխխոսնակը պետք է լինի ԲՀԿ-ի՞ց, թե՞ ԼՀԿ-ից:  Մենք գտնում  ենք, որ մեր առաջադրած թեկնածուն ավելի լավը կլինի, քան ձեր թեկնածուն: Մենք ձեզ հետ կռիվ չունենք, դուք չեք` որոշելու տիկին Թանդիլյանը լինի՞ փոխխոսնակ, թե՞ ոչ, իրենց հետ ունենք»,- ասաց նա:

Մարուքյանի այս հայտարարությանը դուր չեկավ իշխող ուժի պատգամավոր Սասուն Միքայելյանին: Նա Մարուքյանի հայտարարությունը վիրավորանք համարեց:

«Մյուս անգամ, որ ես խոսում եմ, չմիջամտեք: Եթե ես վիրավորել եմ ,կարող եմ ներողություն խնդրել: Բայց դուրս եկավ, որ միայն դուք վիրավորվեցիք: Եես ոչ մի վիրավորական բան չեմ ասել»,- ասաց Մարուքյանը:

Մանե Թանդիլյանն էլ իր ելույթում նշեց, որ սա իշխող ուժի պատգամավորների գուցե միակ ընտրությունը լինի, և դա բացատրեց հետևյալ կերպ. «ԱԺ նախագահի, իշխանական փոխնախագահների, մշտական հանձնաժողովների նախագահներին դուք չեք ընտրում, դրանք քաղաքական որոշում են: Սա կարող է լինել ձեր միակ ընտրությունը»,- ասաց նա: