Վարչապետի աչքը վախեցել է

Քիչ առաջ մեկնարկեց Հայաստանի Հանրապետական կուսակցության նախաձեռնած` ՀՀԿ երկրորդ տնտեսական համաժողովը: Այս համաժողովը, զուտ տնտեսական թեմաներով հետաքրքիր լինելուց զատ, նաեւ ուշագրավ է այն առումով, որ ՀՀԿ-ն նախընտրել է լրագրողներին մեկուսացնելու ձեւաչափը, որը բնորոշ չէ համաժողովներին: Այսինքն' լրագրողներին հատկացրել են աշխատասենյակ, որտեղ նրանք միայն էկրաններից կարող են հետեւել, թե ինչ է կատարվում համաժողովի դահլիճում:

Հիշեցնենք, որ նման ձեւաչափով ՀՀԿ-ն իր համագումարներն է անցկացնում, այն էլ, հավանաբար, պայմանավորված Սերժ Սարգսյանի գործոնով, որ լրագրողներից որեւէ մեկը հանկարծ չհամարձակվի նրան մոտենալ, առավել եւս` հարց տալ: Իսկ համաժողովը «սվոյներով» անելու միտքը, հավանաբար, ծագել է` ոչ վաղ անցյալի «դառը փորձը» հաշվի առնելով:

Հիշում եք` երբ կառավարության նախաձեռնած բնապահպանական համաժողովի ժամանակ բնապահպան ակտիվիստներն ու բնապահպանական ՀԿ-ների ներկայացուցիչները ներխուժեցին համաժողովի դահլիճ, ինչի արդյունքում բավականին սկանդալային իրավիճակում հայտնվեցին ՀՀԿ-ական նախարարները, հատկապես' բնապահպանության նախարարը: Այդպիսի մի ուշագրավ միջադեպ էլ գրանցվել էր պարտադիր կուտակային կենսաթոշակային համակարգի քննարկման համար հրավիրված խորհրդաժողովի ժամանակ:

Ուստի ՀՀԿ-ն այս անգամ նախազգուշական միջոցառումներ է ձեռնարկել` համաժողովի ներկայացուցիչներին «հուսալիորեն» մեկուսացնելով ակտիվիստներից, լրագրողներից ու նրանց անցանկալի հարցերից...