Սիրիայի վերաբերյալ հայտարարության համար թուրք լրագրող է ձերբակալվել

Թուրքիայի մայրաքաղաք Անկարայում ձերբակալվել է Ոստիկանության ակադեմիայի նախկին անդամ և Taraf պարբերականի նախկին լրագրող Օնդեր Այթաչը:

Ըստ T24-ի՝ Թուրքիայում մեծ աղմուկ բարձրացրած` ԱԳ նախարար Դավութօղլուի ձայնագրության մասին նա խոսել էր Samanyolu Haber-ում և հայտնել, որ Սիրիայում թուրքական հող համարվող` Սուլեյման Շահի դամբարանի վրա հարձակում է տեղի ունենալու:

Պարզ չէ՝ սա դիտավորյալ քա՞յլ է Թուրքիայի կողմից՝ ցույց տալու, որ Սիրիայի հարցով ցանկացած անպատասխանատու հայտարարություն պատժի կարժանանա, թե՝ ոչ, սակայն տրամաբանական չէ նաև այն, որ մի լրագրող կարող է նման պատասխանատու հայտարարություն անել՝ առանց հիմնավորումների:

Նշենք, որ երեկ  համացանցում տեղադրված ձայնագրության մեջ Ազգային հետախուզության ծառայության պետ Հաքան Ֆիդանը պնդում է, որ ինքը նույնիսկ 4 մարդ կարող է ուղարկել Սիրիա, որոնք այնտեղից 8 հրթիռ կարձակեն Թուրքիայի տարածքի ուղղությամբ, ինչը պատճառ կհանդիսանա Սիրիայի դեմ պատերազմ սկսելու համար: