Ես հո Նոստրադամուսը չեմ, որ իմանամ՝ գազի գինը կբարձրանա՞, թե՞ ոչ. Ռոբերտ Նազարյան

Այսօր գազի հարցերով ժամանակավոր հանձնաժողովի քննարկմանն էին մասնակցում նաև ՀՀ էներգետիկայի ու բնական պաշարների նախարար Արմեն Մովսիսյանը և Հանրային ծառայությունները կարգավորող հանձնաժողովի նախագահ Ռոբերտ Նազարյանը: Նիստի քննարկումները տևեցին երեք ժամից ավելի: Նիստից հետո էներգետիկայի նախարար Արմեն Մովսիսյանը չցանկացավ պատասխանել լրագրողների հարցերին՝ պատճառաբանելով, որ ոտքի վրա դժվարանում է խոսել:

ՀԾԿՀ նախագահ Ռոբերտ Նազարյանը, պատասխանելով Yerkir.am-ի հարցին՝ արդյոք նպաստելո՞ւ են հանձնաժողովի աշխատանքներին, պատասխանեց, որ ոչ միայն նպաստելու է, այլեւ անելու է հնարավոր ամեն ինչ, որպեսզի հանձնաժողովն արդյունավետ աշխատի և կարողանա հանրությանը սպառիչ պատասխաններ ներկայացնել: Մեր հարցը` հնարավո՞ր է, որ հանձնաժողովի աշխատանքների արդյունքում աղմկոտ բացահայտումներ, հետևաբար՝ դատական գործընթացներ լինեն, Ռոբերտ Նազարյանին դուր չեկավ: Նա ասաց, որ իրեն սխալ հարց է ուղղվում: Եվ երբ հստակեցրինք, որ նկատի ունենք «Հայռուսգազարդի» սպառողների հանդեպ իրականացված հնարավոր խարդախությունները, և խոսքը սպառողի իրավունքների պաշտպանության մասին է, Ռոբերտ Նազարյանը կրկին տարակուսեց. «Երիտասարդ լրագրող եք, ինչո՞ւ եք նման հարցեր տալիս»:

«Ինձ ինչի՞ համար եք տենց հարց տալիս: Դուք ինձ հարցնում եք` ինչ կանեք, ես ասում եմ` ամեն ինչ կանեմ, կաջակցեմ, օգտակար կլինեմ, որպեսզի հանձնաժողովը լիակատար պատկերացում կազմի այն հարցերի մասին, որոնք իրենց հետաքրքրում են»,- ասաց նա:

Մեր այն հարցին, թե հնարավո՞ր է, որ գազը թանկանա, նա պատասխանեց, որ գազի թանկացման վերաբերյալ հանրային ծառայությունները կարգավորող հանձնաժողովը հայտ չի ստացել: «Չեմ կարող ասել` գազի գինը կթանկանա՞, թե՞ ոչ: Կարծում եմ` չէ, չի թանկանա, եթե նման բան լիներ, պետք է արդեն ներկայացված լինեին հայտերը: Ես տեղյակ չեմ Ռուսաստանում տեղի ունեցող զարգացումներից, ես տեղյակ կլինեմ այն ժամանակ, երբ «Գազպրոմ Արմենիա»-ն մեզ սահմանի վրա գազի գնի բարձրացման վերաբերյալ հայտ ներկայացնի: Ես հո Նոստրադամուսը չեմ, որ իմանամ` գազի գինը կբարձրանա՞, թե՞ ոչ: Կարծում եմ, որ` ոչ, դա իմ լավատեսական կարծիքն է»,- ասաց նա:

Ինչ վերաբերում է գազի կալորիականությանը, Նազարյանը նշեց, որ այդ հարցերի մեծ մասը նույնպես քննարկվելու է ժամանակավոր հանձնաժողովում: Նա նաև հավելեց, որ կառավարությունը նույնպես ստեղծել է հանձնաժողով, որպեսզի վերլուծություններ կատարի և համապատասխան եզրակացություններ ներկայացնի վարչապետին` այդ ոլորտում վիճակն ավելի հասկանալի և պատկերավոր դարձնելու համար: